Кыргызстандагы илбирстердин учурдагы саны айтылды

Журналист: АЙСУЛУУ ТАЛАНТ

27.10.2026, 11:46

3755

коом

Кыргызстанда илбирстердин саны 1990-жылдарга салыштырмалуу дээрлик эки эсеге азайган. Мунун негизги себептеринин бири браконьерлик болгон. Бул тууралуу Жаратылыш ресурстары, экология жана техникалык көзөмөл министрлигинин Биологиялык ар түрдүүлүктү сактоо жана өзгөчө корголуучу жаратылыш аймактары департаментинин директору Талантбек Турдуматов «Биринчи радионун» эфиринде билдирди.

Анын маалыматына караганда, 1990-жылдары Кыргызстанда болжол менен 1 000 илбирс жашаса, учурда алардын саны 500–550гө бааланууда.

Адистер акыркы жылдары фотокапкандар аркылуу алынган маалыматтардын негизинде илбирстердин популяциясы калыбына келе баштаганын белгилешүүдө.

Турдуматовдун айтымында, 1955-жылдан бери Кыргызстанда 400гө жакын илбирс кармалып, чет өлкөлөрдөгү зоопарктарга берилген.

Учурда илбирстер өлкөнүн бир катар аймактарында кездешет. Алар эң көп Ысык-Көл облусунда катталса, Нарын, Жалал-Абад, Талас жана Чүй облустарында, ошондой эле республиканын түштүгүндө да байкалган.