Россия президентинин басма сөз катчысы Дмитрий Песков CNN телеканалына берген маегинде Владимир Путиндин Украина менен Түркиядагы сүйлөшүүлөргө катышуусу мүмкүн эместигин билдирди.

Бүгүн Стамбул шаарында Россия менен Украинанын акыркы үч жыл ичиндеги алгачкы сүйлөшүүлөрү өтөт деп күтүлүүдө. Алар күндүн экинчи жарымында башталып, 2022-жылдагыдай эле Түркия президентинин администрациясынын жумуш кеңсеси жайгашкан Долмабахче сарайында болот.

Россия делегациясын мурдагыдай эле президенттин жардамчысы Владимир Мединский жетектейт. Делегация курамында ошондой эле Тышкы иштер министринин орун басары Михаил Галузин, Генштабдын Башкы башкармалыгынын башчысы Игорь Костюков жана Коргоо министрлигинин орун басары Александр Фомин бар.

Өткөн аптада Владимир Путин Украинага алдын ала шарттарсыз түз сүйлөшүүлөрдү кайра баштоону сунуш кылган. Ал Киев макул болгон учурда ок атууну чындап токтотууга жетишүүгө болорун баса белгилеген.

Украина президенти Владимир Зеленский бул тынчтык демилгеге ультиматум менен жооп кайтарды: анын айтымында, Киев сүйлөшүүлөргө отурат, бирок Москва 12-майдан тарта ок атууну толук токтотууга макул болсо гана. Бирок АКШ президенти Дональд Трамп Киевди Москва сунуш кылган шартка дароо макул болууга чакыргандан кийин, Зеленский бейшемби күнү Түркияда Россия лидери менен жолугууга даяр экенин билдирген.

Бүгүн түнү Reuters агенттиги америкалык атын атабаган чиновникке шилтеме берип, Трамп мурда Түркияга барып сүйлөшүүлөргө катышуу мүмкүнчүлүгүн карап көргөнүн, бирок бул идеядан баш тартканын кабарлады.