Сасыкбаеванын баласын сактап калды

Журналист: NAZARNEWS

11.09.2018, 22:14

18305

саясат

Экс-депутат Асия Сасыкбаеванын уулу Марат Айтимбетов баңгизат үчүн 25 миң сом айып төлөп кутулду. Мындай чечимди Октябрь райондук соту чыгарды. Маалыматта шектүү өз айыбын моюндап, өкүнгөнү айтылат.

Эске сала кетсек, Бишкек ИИБнин маалымат кызматы 30-мартта жүргүзгөн ыкчам-иликтөө иштеринин алкагында ИИМдин кызматкерлери кичирайондордун биринде эркек кишини текшергенде, оң бутундагы байпагынан полиэтилен баштыкчасын табышканьш билдирген. Баштыкчадан порошок түрүндөгү ак түстөгү зат чыккан.

Алынган зат экспертизага жөнөтүлүп, жыйынтыгында ал 0,591гр салмактагы "Альфа РҮР" деп аталган психотроптук зат экендиги аныкталган. Бул факты боюнча Октябрь райондук ИИБси Кылмыш-жаза кодексинин 246-беренеси ("Башкага берүү максатын көздөбөстөн баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү") менен кылмыш ишин козгогон.

Кармалган адам экс-депутат, экс-вице спикер Асия Сасыкбаеванын уулу 1989-жылы туулган Марат Айтимбетов болуп чыккан. Ага карата соттун 2 айга камакка алуу жөнүндө чечими чыккан болчу.

Булак: "Фабула"