Кечээ күнү Бишкекте эки китептин удаа бет ачаары болду, алар – Таабалды Эгембердиевдин макалалары чогултулган «Оо, дарегим! Оо, карегим!» деген китеп жана «Көчмөн жаратман» деп аталган Таабалды жөнүндөгү эскерүүлөр жыйнагы. Китептер үстүндө 5 жыл бою Таабалдынын жубайы Жаңылсынзат Бердигулова иштеген, ага балдары жана Таабалды бар кезде эле анын ишканасын башкарып калган иниси Жумадыл жардамдашкан.

Өлкөсүнүн чыныгы жараны катары, Таабалды 1980-жылдардын аягында жана 1990-жылдардын башында демократиялык митингдерге катышкан, кийин КДКнын жетекчилеринин бири болгон, андан соң тили курч публицист катары элге таанылган жана андан кийин – экономиканы кантип көтөрүш керектигин иш жүзүндө көрсөтүү максатында «Шоро» ишканасын негизден, андан соң – азыр бүткүл өлкө сыймыктанган «Супара» менен «Чункурчакты» курган.

Бул – жеке демилге канчалык деңгээлге чыга ала турганын көрсөтөт. «Боинг» же «Мерседес» компаниялары дагы жеке менчик, бирок алар менен Америка дагы, Германия да сыймыктанат.