Министрлер кабинетинин төрагасы Адылбек Касымалиевдин атына чет мамлекеттердин өкмөт башчыларынан Жеңиш күнүнө карата куттуктоо телеграммалары келип түштү. 

Атап айтканда, Беларустун премьер-министри Александр Турчин куттуктоо жолдогон, анда Жеңиш күнү фронтовиктердин жана тылдагы эмгекчилердин эрдиги жөнүндөгү жалпы эс тутум менен бир тууган элдерди бириктирген ыйык майрам экенин белгилеген. Ал согуш жылдарында чыңалган достук байланыштары бүгүнкү күндө Беларусь менен Кыргызстандын ортосундагы стратегиялык өнөктөштүктү өнүктүрүү үчүн бекем негиз болуп кызмат кыларын баса белгиледи. 

Казакстандын премьер-министри Олжас Бектенов өз куттуктоосунда 9-май эрдиктин жана баатырдыктын символу экенин, ал эми ата-бабалардын эрдиги келечек муундар үчүн үлгү болуп кала берерин белгиледи. 

"Казакстан менен Кыргызстандын элдерин жалпы тарых, бир туугандык мамилелер жана өз ара колдоонун бекем каада-салттары бириктирип турат. Бул байланыштар биздин өлкөлөрдүн ортосундагы союздаштык мамилелерди мындан ары да чыңдоого негиз болот деп ишенем", - деп айтылат телеграммада. 

Россиянын өкмөтүнүн төрагасы Михаил Мишустин өз кайрылуусунда советтик жоокерлердин нацизмди жеңген эрдигинин маанисин баса белгиледи. 

"Бул күнү биз нацизмди жеңип, Ата Мекендин эркиндигин жана көз карандысыздыгын коргоп калган советтик жоокерлердин эрдигине жана баатырдыгына таазим этебиз. Алардын теңдешсиз эрдиги азыркы жана келечек муундардын эсинде жашай берет", - деп айтылат телеграммада. 

Тажикстандын премьер-министри Кохир Расулзода Жеңиш күнү тынчтыкты жана эркиндикти коргоп калган элдердин эрдигинин жана жан аябастыгынын символу бойдон кала берерин белгиледи. Анын айтымында, жеңүүчү муундун эрдиги тууралуу эскерүүлөр Тажикстан менен Кыргызстандын ортосундагы достукту жана өнөктөштүктү бекемдөөнүн бекем негизи болуп саналат.

"Биз фронтто жана тылда өздөрүнүн өмүрүн аябай, ийиндеш туруп, планетаны фашисттик коркунучтан сактап калган, тынчтыкты жана эркиндикти коргоп калган аталарыбызга, чоң аталарыбызга жана апаларыбызга чексиз ыраазыбыз. Бүгүн биздин элдер Өзбекстандын жана Кыргызстандын боордош элдеринин миллиондогон өкүлдөрүнүн жаркын элесине терең ыраазычылык менен баш ийишет, алар башка мурдагы союздук республикалардын өкүлдөрү менен бирге согуш жылдарынын оор мезгилин басып өтүп, жалпы Жеңишибизге баа жеткис салым кошушту", - деп Өзбекстандын премьер-министри Абдулла Арипов телеграмма жолдоду. 

Евразия экономикалык комиссиясынын коллегиясынын төрагасы Бакытжан Сагинтаев төмөнкү мазмундагы куттуктоо жолдоду.

"9-май - бул өзгөчө майрам, эр жүрөк жана жан аябас баатыр-жеңүүчүлөрдүн каармандыгына түбөлүк ыраазычылык билдирүү. Бул күн биздин жүрөгүбүздө каармандыктын, аскердик даңктын жана эмгектин символу катары өзгөчө орунду ээлейт! Үйлөрүбүздө дайыма тынчтык жана гармония болсун", - деп айтылат куттуктоодо.