Эми кей-поп жылдызы Гу Харанын өлүгү өз үйүнөн табылды

Журналист: NAZARNEWS

27.11.2019, 2:27

26973

маданият

Түштүк Кореянын белгилүү ырчысы жана актрисасы Гу Харанын сөөгү анын Сеулдагы үйүнөн табылган. Бул тууралуу чет элдик басылмалар жазып чыкты.

Ал 28 жашта болчу, KARA кей-поп тобунун мурдагы ырчысы болгон. Бул топто 2008-жылдан тарта ырдап келген. Бирок кийин топтон кетип, өзүнүн жеке альбомун чыгарып, киного тартылып жүргөн. Өткөн жумада эле бир катар концерттерде ырдап чыккан.

Гу Харанын сөөгүн кечки саат 18:00 чамасында Сеулдун полициясы тарбынан табылган. Учурда полиция ырчынын өлүмүнө иликтөө иштерин жүргүзүүдө.

Акыркы жылдары анын чыгармачылыктагы ийгилигине жеке жашоосундагы окуялар көп тоскоолуктарды жаратканы айтылып жатат. 2018-жылы сентябрь айында Гу мурдагы жигитин сотко берген. Себеби, жигити интим видеосун интернетке жарыялап, карьерасын токтотом деп коркуткан. Соттун чечими менен анын мурдагы жигити камалган.

Эске салсак, ушул жылдын октябрь айында 25 жаштагы кей-поп жылдызы Соллинин жансыз денеси Сеулга жакын жердеги үйүнөн табылган. Басылмалар ырчыга коомдук сайттар аркылуу көп чабуул болгонун, ушул себептен улам өз өмүрүнө кол салган деп жазышкан. Ал эми, Солли менен Гу Хара өтө ынак курбулардан болуп, экөөнүн мамилеси эже-сиңдилердей ысык болгон.

Булак: NazarNews.kg