Ички иштер министри, милициянын генерал-майору Кашкар Жунушалиев Катар Мамлекетинин Кыргыз Республикасындагы Атайын жана Ыйгарым укуктуу Элчиси Абдулла бин Ахмед Аль-Сулейти менен жолугушту. Бул тууралуу ИИМдин Басма сөз кызматы билдирди.

Аталган жолугушуунун максаты болуп Кыргыз Республикасынын ИИМи менен Катар Мамлекетинин ортосундагы мындан аркы кызматташуусу тууралуу маселелерди талкулоо эсептелди.

Жолугушуунун башында ИИМ башчысы элчини ар тараптан колдоо көрсөткөндүгү жана жемиштүү кызматташтыгы үчүн ыраазычылыгын билдирди. Жолугушуунун жүрүшүндө Катар мамлекетинин Кыргыз Республикасындагы Атайын жана Ыйгарым укуктуу Элчиси Абдулла бин Ахмед Аль-Сулейти Кашкар Джунушалиевге Катар Мамлекетинин көз карандысыздыкты алган күнүнө арналган иш-чарага катышуу үчүн расмий чакырууну тапшырды. Андан сырткары эки тараптын кызыкчылыгын көздөгөн маселелер талкууланып, өз пикирлери менен бөлүшүштү.

Ошондой эле, кыргыз-катар мамилелерин мындан ары бекемдөө тууралуу маселелер каралып, тараптар укук коргоо түзүмдөрүнүн эки тараптуу кызматташууларынын учурдагы деңгээлин жогору баалышып, аны өнүктүрүү боюнча өз пикирлерин билдиришти. Жолугушуунун аягында ИИМдин башчысы Кашкар Жунушалиев көп жылдардан берки достук мамиле министрликтердин эки тараптуу кызматташуусун бекемдөөгө жана өнүктүрүүгө жардам берээрин билдирди.

Жолугушуу өтө жылуу, достук мамиледе жана бири-бири түшүүнүү менен иштиктүү чөйрөдө өттү.

Булак: NazarNews.kg