Президент Садыр Жапаров Шотландиянын Глазго шаарында өтүп жаткан Глобалдык климаттык форумга жеке учак менен учуп кетти. Бул тууралуу flyradar24.com сайтынын маалыматтарын изилдөө учурунда белгилүү болду.

Ал "Манас" аэропортунан Дубайдын Embraer Lineage 1000 бизнес-учагы менен учуп кеткен. Бул маалыматты президенттик аппараттан да тастыкташты. Мындай чечим, расмий өкүлдөрдүн айтымында, кабыл алган тарап президент учкан Ту-154 учагынын өлкөгө конуу мүмкүн эместигин жарыялаганына байланыштуу кабыл алынган. Учак техникалык жактан эскирген жана эл аралык талаптарга жооп бербейт.

Президенттик администрация британ бийликтеринин жообу "акыркы учурда" келгенин баса белгилейт. Ал эми башка учакты тездетилген темп менен издөө керек болчу. Мындан тышкары, администрациядан белгиленгендей, жеке учакта учуу арзаныраак. Садыр Жапаров конференцияга катышуу үчүн бир күн мурун Глазго шаарына жөнөп кеткен. Ал 4-ноябрда кайтып келет.

Климаттык конференция былтыр өтмөк, бирок коронавирустун пандемиясынан улам бир жылга жылдырылган. Дүйнөнүн 100дөн ашуун өлкөсүнүн лидерлери 2015-жылы Климат боюнча Париж келишимине кол коюу менен башталган беш жылдык циклдин жыйынтыгын чыгарат. Анда азыркы кылымда планетадагы температура орто эсеп менен 2ден ашык эмес, Цельсий боюнча 1,5 градуска көтөрүлсө, ал адамзат үчүн жагымдуурак экени белгиленген. Дал ушул чек экосистемага кайтарылгыс таасиринен качууга мүмкүндүк берет деп айтылат. Бирок документте дагы эле мындай чектин сакталышын көзөмөлдөө механизми, же мажбурлоо чаралары көрсөтүлгөн эмес.

Глазгодо конвенциянын тараптары жашыл энергия булактарына өткөн азыраак өнүккөн өлкөлөргө жыл сайын 100 миллиард доллар өлчөмүндө туруктуу жардам көрсөтүү маселеси каралыш керек.

Булак: NazarNews.kg