Каржы министрлигинин маалыматы боюнча, учурда мамлекеттик тышкы карызды кечүү боюнча кредиторлор менен сүйлөшүүлөр жүргүзүлгөн жок. Сүйлөшүүлөргө жооптуу департаменттер алардын ушул багыттагы иш-чараларынын планын билдирбей келет.

Кыргызстанда пандемиядан улам бюджеттин кирешеси азайып, чыгашасы көбөйгөн. Өлкө жаңы насыяларды алып, эскилерин узартуу боюнча сүйлөшүүлөрдү жүргүзө баштаган - башкача айтканда, төлөмдөрдү кийинкиге калтырууну суранды.

Министрлик кайсы кредиторлор менен сүйлөшүүлөр жүрүп жаткандыгы жөнүндө толук маалымат берген жок. Июль айында бийлик дээрлик эки тараптуу насыя берүүчүлөр менен тышкы карызды тейлөө үчүн төлөмдөрдү кийинки 3-4 жылга калтыруу боюнча келишим түзүлгөнүн жарыялаган. Сентябрь айында мурдагы президент Сооронбай Жээнбеков Кытайдан тышкы карызды төлөөнү жеңилдетүү жана мөөнөтүн узартууну карап көрүүнү суранган. Ошол эле учурда БУУнун Башкы Ассамблеясында "туруктуу өнүгүү долбоорлорунун ордуна тышкы карызды терең реструктуризациялоону" сунуш кылган.

Андан кийин беш кредитор менен төлөмдөрдүн убактысын узартуу боюнча келишимдер түзүлгөнү белгилүү болгон. Жаңыланууга жаткан насыялардын жалпы суммасы болжол менен 51 миллион долларды түзөт. Каражат төрт жылдын ичинде төлөнүшү керек (2021-2024), биринчи жылда жеңилдетилген шарттарда төлөөгө болот.

Эскерте кетсек, Кыргыз Республикасынын мамлекеттик карызы 4,8 миллиард доллардан ашат, анын дээрлик 4,2 миллиарды тышкы насыяга туура келет. Бул өлкөнүн тарыхындагы рекорддук көрсөткүчтөр.

Мурда Премьер-министрлик милдетти аткаруучу Артем Новиков Жогорку Кеңеште сүйлөп жатып, Кытайга карызды төлөөнү кийинкиге калтыруу маселеси боюнча консультациялар жүрүп жаткандыгын билдирген. Анын айтымында, карызды төлөө кечиктирилген учурда, кыргыз тарап кошумча 3 миллиард сом төлөшү керек. 

Булак: NazarNews.kg