Украинанын президенти Владимир Зеленский орус аскерлери Донбассты "толугу менен кыйратканын" билдирди.

Зеленский 19-май күнү кечинде видеокайрылуу жасап, орус күчтөрү көбүрөөк украиндерди өлтүрүүгө жана көп чыгым келтирүүгө умтулуп жатканын айтты. Ал Орусия геноцид жасап жатат деген айыптоосун кайталады.

"Ал жер тозок – бул көбүртүп-жабыртуу эмес", - деп кошумчалады Зеленский. Ал 19-майда Северодонецктеги аткылоодон 12 киши өлгөнүн айтты.

"Одесса облусуна, борбордук Украинанын шаарларына дайыма сокку уруу улантылууда, Донбасс толугу менен кыйрады", - деди ал.

Зеленский 19-майда Улуу Британиянын премьер-министри Борис Жонсон жана Еврокомиссиянын төрайымы Урсула фон дер Ляйен менен бир катар маселелер боюнча сүйлөшкөнүн, анын ичинде айыл чарба азыктарынын экспорту жана "Азовсталдагы" баатырларды эвакуациялоо" жөнүндө сөз болгонун билдирди.

Кызыл Чырым эл аралык комитети орус күчтөрүнүн камоолунда калган Мариупол шаарындагы "Азовсталь" заводунан Орусия чыгарып кеткен украин аскерлерин каттап баштаганын маалымдаган.

Кызыл Чырым эл аралык комитетинин билдиришинче, аскерлердин өздүк маалыматтары, анын ичинде аты-жөнү, туулган жылы жана жакын туугандарынын ысымдары документтештирилип жатат. "Бул ким колго түшкөнүн тактоого жана алардын үй-бүлөлөрү менен байланышын камсыздоого жардам берет", - деп айтылган билдирүүдө.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg