Кыргызстандын Башкы прокуратурасы 10-январдагы президенттик шайлоодо талапкер болгон УКМКнын мурдагы төрагасы Абдил Сегизбаев "Белизгейт" фактысы боюнча кармалып, камакка алынганын билдирди. Мекеменин 25-январдагы маалыматында УКМК менен Аскер прокуратурасынын биргелешкен иликтөөсүндө Сегизбаевдин күнөөлүү экени боюнча далилдер табылганы айтылат. Бул тууралуу Азаттык жазып чыкты.

Буга байланыштуу ал Кылмыш-жазык кодексинин 98-беренесинин негизинде кармалып, Бишкек шаардык милициясынын убактылуу кармоочу жайына киргизилгени жазылган. Учурда сотко чейинки өндүрүштүн алкагында Сегизбаевден башка шектүүлөрдү аныктоо иштери жүрүп жатканы кабарланды.

Башкы көзөмөл органынын билдирүүсүнө караганда, 14-январда "Белизгейт" боюнча мурдагы депутат Алмамбет Шыкмаматов жана башка адамдардын кайрылуусу менен иш Кылмыш кодексинин 320-беренесинин негизинде сотко чейинки өндүрүшкө алынган.