Америка Кошмо Штаттарынын алты штатында 53 торнадо катталып, алардын кесепетинен ондогон адам каза болду. Бул тууралуу Улуттук метеорология кызматынын маалыматында айтылат. Торнадолор Кентукки, Арканзас, Иллинойс, Миссури, Миссисипи жана Теннесси штаттарында болду.

Торнадо 10-декабрдын кечинде башталган. Кентуккиде, расмий маалыматтар боюнча, кеминде 70 адам каза болгон. Штаттын губернатору Энди Бешир каза болгондордун саны 100гө жакын болушу мүмкүн экенин билдирди.

Кентуккинин батышындагы Мэйфилд шаарында эң оор кесепеттер катталган: торнадодон улам ал жерде шам заводунун чатыры кулап түшкөн. Заводдун ичинде 110 адам болгон. Губернатордун айтымында, алардын кыркы тирүү табылган, калгандарынын абалы азырынча белгисиз. Бешир 12 округдагы төрт торнадо болгон катаклизмди штаттын тарыхындагы эң кыйратуучу катаклизм деп атады.

Арканзас штатында эки адам, анын ичинде карылар үйүнүн бир жашоочусу каза болду. Иллинойс штатында «Amazon» кампасы урап, кеминде алты адам каза болду. Миссуриде дагы бир адам торнадодон каза болду.

АКШнын президенти Джо Байден өлкөнүн торнадодон жабыркаган аймактарына жардам жөнөтүүнү буйруду.

Булак: NazarNews.kg