“Антошканы” ижарага алып иштеткен адам үй камагына чыгарылды. Бул тууралуу Бишкек ШИИББи кабарлады.

Маалыматка караганда, мындай чечимди Свердлов райондук соту чыгарган.

Эске салсак, 8-ноябрда Бишкектин Чүй проспектиси менен Эркиндик бульварынын кесилишинде жайгашкан “Антошка” тез татым кафеси жарылып, өрттөнүп кеткен. Кырсыктан бир адам каза болуп, 15 адам жабыркаган.

Ошол эле күнү Бишкек ШИИББинин тергөө кызматы тарабынан тергөө иштерин жүргүзүү учурунда 1963-жылы туулган К.А. аттуу “Антошка” кафесинин ижарачысы кармалып, убактылуу кармоочу жайга киргизилген.

Булак: NazarNews.kg