Дүйнөгө белгилүү Ким Ки Дук Covid-19 илдетинен улам дүйнө салды

Журналист: АЙПЕРИ БАКЫТБЕК КЫЗЫ

11.12.2020, 22:30

21805

дүйнө жүзүндө

Түштүк кореялык белгилүү кинорежиссер Ким Ки Дук COVID-19 илдетинен улам каза болду

Канн, Венеция жана Берлин кинофестивалдарынын лауреаты Латвияга 20-ноябрда келген жана 5-декабрдан бери байланышка чыкпай келген, деп билдирди “Артдокфесттин” директору Виталий Манский.

Режиссер Латвияга Санкт-Петербургдан Эстония аркылуу келген. Расмий эмес маалыматтарга караганда, дүйнөгө белгилүү режиссер Юрмалада үй сатып алып, ал жерде жашоого уруксаат алууну пландап жаткан, бирок белгиленген жыйынга келген эмес. Андан кийин анын кесиптештери коңгуроо кагышып, ооруканаларда издей башташкан, бирок жеке маалыматтарды коргоо эрежелеринен улам аны табуу кыйын болгон.

Бүгүн режиссер ооруканада COVID-19 оорусунун айынан түнкү саат 1: 20да көз жумганы маалым болду.

Ким Ки Дук - эл аралык деңгээлде белгилүү Түштүк Кореялык кинорежиссер жана сценарист. "Пиета" жана "Бош үй" тасмалары үчүн Венеция кинофестивалынын, "Ариранг" тасмасы үчүн Канн кинофестивалынын, "Самариялык аял" тасмасы үчүн Берлин кинофестивалынын лауреаты.

Ошондой эле "Жаз, Жай, Күз, Кыш жана Жаз", "Созулган Жаа", "Убакыт", "Ыңыр" кинотасмаларынын автору катары белгилүү.

Булак: NazarNews.kg