Актау шаарындагы 3-кичирайондо аралаш мушташ боюнча мушкер Вусал Жафаровдун сөөгү табылды. Бул тууралуу Tengrinews.kz сайты жазды.

Спортчунун сөөгү 20-сентябрда таштанды челегинин жанынан табылган. Денеси жыттанып, шишип, карарып кеткен. Жафаров токмоктолуп, анын сөөгү бир нече күн көчөдө жатканы айтылды.

Мангистау облустук ички иштер башкармалыгынын басма сөз кызматы иштин айрым чоо-жайын ачыктады.

«Окуя болгон жерди текшерүү учурунда маркумдун жанынан шприц, байпагынан баштыктагы зат табылган. Маркумдун мурда да каракчылык фактысы боюнча соттолгондугу аныкталып, тергөө амалдары жүргүзүлүүдө», — деп айтылат маалыматта. 

Вусал Жафаров 1994-жылы төрөлгөн. Өзүнүн спорттук карьерасын 2015-жылы баштаган. Төрт жолу беттешке чыгып, 3 жолу жеңилип, бир жолу жеңген.