_{Кыргызстанда май айынын аягында биринчи жолу 15 адамдын боорун, төрт кишинин жилик чучугун алмаштыруу пландалууда. Бул тууралуу саламаттыкты сактоо министри Алымкадыр Бейшеналиев билдирди.}

_{Анын айтымында, операциялар президенттин демөөрчүлүк фондунан каржыланат. Башкача айтканда, бейтап донорду өзү таап, операцияга кеткен чыгымды президент төлөйт.}

_{«Буга чейин бейтаптар боорду чет өлкөгө барып алмаштырып келишчү. Мисалы, Индияда боор алмаштырыш үчүн 55 миң доллар, Түркияда болсо 75-80 миң долларга чейин каражат жумшалчу. Ал эми жилик чучугун алмаштырыш үчүн чет өлкөлөрдө 130 миңден 160 миң долларга чейин турат», — деп жазган Алымкадыр Бейшеналиев.}

_{Ошондой эле министр Жапаровдун тапшырмасы менен өлкөдө 10дон ашык бейтаптын бөйрөгү алмаштырылып, чыгымын мамлекет төлөгөнүн айткан.}

_{Мындан тышкары, Бейшеналиев учурда гемодиализде жаткан 3 миңге жакын адам бар экенин жана көпчүлүгүнө донор табылбай жатканын айтып, оорулуулардын туугандарына: «Колуңардан келсе жакындарыңарга бөйрөк боюнча донор болуп берүүңөрдү суранат элем», — деп кайрылды.}

_{Булак: NazarNews.kg}