Өзгөчө кырдаалдар министрлигинин алдындагы Гидрометеорология боюнча агенттигине Азия Өнүктүрүү Банкы тарабынан абанын сапатын көзөмөлдөөчү жабдыктар тапшырылды. Бул тууралуу ӨКМнын басма сөз кызматынан кабарлашты.

"Гидрометеорология агенттигинин Атмосфералык абанын булгануусун байкоо бөлүмүнүн башчысы Бегайым Алипованын айтымында, 2020-жылы Бишкек шаарында жана Чүй облусунун Аламүдүн, Сокулук райондорунда абанын сапатын жогорулатуу боюнча комплекстүү иш-чаралардын планын ишке ашыруу максатында Азия Өнүктүрүү Банкы менен кызматташтык жөнүндө меморандумга кол коюлган. Ушул меморандумдун алкагында жылдын акырына чейин Бишкек шаарында жана анын чет жакаларында 50 даана "Clarity NODE S" датчиктери орнотулат.

Датчиктерди орнотуудан мурда Бишкек шаарын жана анын айланасын картага жайгаштыруу үчүн бир топ жумуштар жасалган. Абанын булганышы тууралуу кененирээк маалымат алуу үчүн жабдыктар Бишкек шаарында гана эмес (борбордо 42 сенсор бар), Аламүдүн районуна, Сокулук районуна жана Ысык-Ата районуна да орнотулат.

Станциялардын жайгашкан жерлерин тандоодо негизги принцип белгилүү бир таасирди аныктоо болгон жана шамалдын багыты, ылдамдыгы жана жыштыгы эске алынган", - дешти мекемеден.

Аймактардагы абанын булгануусун көзөмөлдөө үчүн датчиктерди төмөнкү аймактарга орнотуу мерчемделүүдө:

Унаа кыймылы менен байланышкан жерлер - 16 даана;

- Автовокзалдардын жанында - 4;

- Өнөр жайга байланыштуу жерлер - 7;

- Көмүрдүн, отундун жана башкалардын күйүшүнөн чыккан түтүнгө байланыштуу жерлер - 9;

- Фондук байкоо - 14 сенсор.

Булак: NazarNews.kg