20-сентябрда Кыргыз Республикасынын президенти Садыр Жапаров менен Өзбекстан Республикасынын президенти Шавкат Мирзиёевдин ортосунда телефон аркылуу сүйлөшүү болду. Бул тууралуу Өзбекстандын президентинин расмий сайтында жарыяланды.

Мамлекет башчылары кыргыз-тажик чек арасындагы соңку каргашалуу окуяларга байланыштуу пикир алышты. Өзбекстандын президенти каза болгондордун үй-бүлөлөрүнө жана жакындарына терең кайгыруу менен көңүл айтып, кырдаалды басаңдатуу боюнча эки тараптуу макулдашууларга жетишүүнү чын жүрөктөн кубаттады.

Өзбекстан менен Кыргызстандын лидерлери Шанхай кызматташтык уюмунун саммитинин программасынын алкагында өткөн иш-чаралардын жемиштүү жыйынтыктарын талкуулашты.

Кызматташтыктын артыкчылыктуу долбоорлору, анын ичинде Кытай-Кыргызстан-Өзбекстан темир жолун куруу долбоорун илгерилетүү боюнча макулдашууларды практикалык ишке ашыруунун маанилүүлүгү өзгөчө белгиленди.

Ошондой эле алдыдагы саммиттерге, анын ичинде аймактык түзүмдөрдүн алкагындагы даярдыктын жүрүшү каралды.

Булак: NazarNews.kg