Дипломун сатыл алган делип жүргөн, бирок төрт жолу депутат болгон Алтынбек Сулайманов эр экен. «Мүйүздүү болом деп кулагынан ажырайт» болуп эми сатып алган диплому менен Ысык-Көлгө губернатор болуп кетти. 2000-жылдары  алюминийпуруш Мамановдун шопуру болуп жүрүп эч жерден окубай туруп дипломду сатып алган, окуган адамдар ким менен бирге окуп, группалаш болгонун билишет да,сатып алган кишинин группалаштары болобу?  Анын жасалма диплому менен депутат болгонун билишкендер эптеп парламенттен чыгып кетиши үчүн Ысык-Көлгө губернаторго кетирген. Эмне губернаторго сатып алган диплом менен иштей берсе болот бекен? Эми муну УКМК иликтесе Сулайманов губернаторлуктан да кол жууйт. Боксер Сулаймановдон тумшуктарын талкалатып жүрчү мамлекет башындагылар аны губернаторлуктан жок кылышып, бир кездеги өчтөрүн алышат окшойт. Бирок, «Бир бол» партиясын түзүп берген Досалы Эсеналиевке кайрылса дагы бир акыл табаар.

Парламентке «Альянс» партиясынан депутат болгон Алтынбек Сулайманов деген чоң муштум бар. Жакында мамлекеттик каттоо кызматында иштеген Кубаныч Имамов той берип, Дача-СУ аймагына улак тарттырганы, байгесине төө, жылкы сайып, ченебей чачылганын кандайча түшүнөбүз? Максат ажы Токтомушев, Алтынбек Сулайманов, Курманкул Зулушев баштаган түштүктүн тыңчыкмалары ат үстүндө азартка батып жүрүштү. Кубаныч Имамов убагында Молдомуса Конгантиевдин асыл тукум аттарын бактырып, шефинин арты менен «майталкандуу» кызматтарда иштеп жүрчү. МАИнин жетекчилигине чейин секирген. Мындай ыкманы кийин баласы Азамат Имамов улантып, Алмамбет Салиевдин күлүктөрүн аздектей таптатып, милицияда карьера жасаганы тар чөйрөгө маалым. Учурда бул жигит Сокулук РИИБде орун басар. Алмамбет Салиевдин мал чарбасын тумшуктууга чокутпай калкалап, улам жер котортуп келгени айтылууда. Ток этерине келсек, чоңдорго той берген Кубаныч Имамов өзү мамлекеттик кызматта иштеп туруп, асман чапчыган байгелерди сайганы, эт-бетине карабай чачылганын кандайча түшүнөбүз? Же башкы прокурор Курманкул Зулушев конок катары төрдө отурса, «Мыйзамсыз баюу» беренеси кыйгап өтөөрүнө ишенсе болот.

Ысык-Көлгө губернатор болгону Алтынбек Сулайманов мойнунан байланып жетеленип калды. Бир убакта тентектик кылып азыр мамлекет башында тургандардын тумшугун жара койгон Сулайманов Алтынбек деген бар? Анын муштумунун салмагы сайдын ташындай ал кездеги президент Атамбаевке каршы турган адамдарды элдин көзүнчө ыза кылганы үчүн аны Атамбаев даңазалап «Алтын бала» деп эркелетип, өз алдынча «Республикадан» бөлүп «Бир бол» партиясын түзүп берип, элиталык бийликке кошкон. Канча акча бергенин ким билет, бир Атамбаев, бир Сулайманов эле билбесе. Бирок, Атамбаевдин башына күн түшкөндө Жээнбековдун колтугуна кире качып, Атамбаевдин кол тийбестигин алып, камаш керек деп божурап чыккан. Эми тумшугун талкалатып алгандар Ысык-Көлгө губернатор кылышты. Ал    «Республикадан», «Бир болго» келгенде Мыктыбек Абдылдаев, Акылбек Жапаров, Исхак Пирматов, Кубанычбек Жумалиев деген эски көпөстөрдү топтоп алган. Бул шайлоодо «Бир болу» өтпөсүнө көзү жетип, «Альянска» өтө качкан.

 «Тентек» Сулайманов президенттин колун кысып, бетинен өөп ыраазычылыгын билдиргени элге жайылды. Бир убакта Ысык –Көл облусуна Балбаке губернатор болгондо президент Жээнбековдун колун кысып, бетинен өөп ыраазычылыгын билдирген, эми аны Алтынбек Сулайманов кайталады. Президенттин жарлыгына ылайык Ысык-Көл облусундагы ыйгарым укуктуу өкүлү болуп дайындалгандан кийин өзүнүн пикирин социалдык тармакка жазып чыккан."Альянс" партиясы менен коштошуп "гүбүрнаторлук" кызматка кадам койгон Алтынбек Сулайманов.

Атамбаевдин таянычы, кийинки президенттин да ишенген адамы болгон «Бир бол» партиясын илбирстин эмблемасы менен жарыкка чыгарган Алтынбек Сулайманов болгон. Эмне экен азыркы министрлер кабинетинин башчысы Акылбек Жапаров ага таянып депутат болгон. Анын партиясындагы илбирсттин эмблемасын Казакстандагы эң зор партия «Нур-Отан» көчүрүп алган. Аны жетектеп турган Дарига Назарбаеваны эми бул партиядан сүрүп жатат. Андан кыйын атасы Нурсултан Назарбаев сүрүлүп баратса. Алтынбек Сулайманов «Бир болдон» мурун Бабановдун «Республика» партиясында болуп туруп Өмүрбек Бабановдун өкмөт башчысына келиши үчүн катуу кам көргөн.

Алтынбек Сулайманов "айныды". Кыргызда өзүнө жарашпаган ишти кылган адамды "айнып калыптыр" деп койот. Алтынбекти илгертен спортсмен, чоң муштум, чыр адам катары эл билет. Чын эле ошондой: бала чагынан эле чырбаш болчу, эми такырбашы кошулду. Мурун көчөдө мушташчу, азыр парламентте мушташа калат кээде-кээде. Садыр Жапаровдун маңдайын жара коюп, Алмаз Шаршенычтан Ташиевдерге кордук көрсөткөнү үчүн "Алтын бала" деген алкоо уккан жайы бар.

"Текебаев ким өзү?" - деп Өмүкеми "Конституциянын атасы" экенине карабай катуу сүзгөн. Эрдиги бар, эси жок Бектур балбандын парламентте жарылчу бомбасына дал ушул Сулайманов суу куйуп өчүргөн.Парламентте талкуу катуулап кеткенде калчылдап чыга калчу. Депутатттык чырларды күч менен жөнгө салып, тентек эл өкүлдөрүн кынына киргизчү. Анан акыркы учурларда ушу бала айныды. Жаш кыздар менен бийлеп атканы бар, Ош базарга барып манты жемейи бар. Артисттерге кошулуп алып, вайнер болуп кетти. Океан ары жагынан пиарщик жалдаганбы, билбейм. Алтынбектин тубаса, нукура образынан алыс башка "стиляга", "гламурный" образ жаралды. Же парттизмеге кирген сулуулардын тилине кирдиби, эмне балээ... Ар кимдин айтканы менен боло берсе, 23-февраль күнү музейге трусаңды ил дешет, ага. Баягы эле кайраттуу, күчтүү, бир аз жинди, бирок элге арка бел болгон Алтынбек өчүп жагалданган адамга өткөн.

Азыркы жагалданган оюндарын таштабаса болбойт. Докем айткандай, бовойт....
Ырысбек Жабиров досунан өтөөр пиарчы жок. Жабиров "Арзуда" лагман жеп отуруп эле, пиарынды катырып, стилинди окшоштуруп койот. Кыргызстандын тарыхындагы эң кымбат клип болгон "Кыргыз бийин" өзүң каржылап, дал ошол кыргыз жыттанган клип кыргыз элин дүйнөгө жакшы ракурста таанытпады беле?
2000-жылы алюминийпуруш Мамановду кантип элдин уулу, мамлекеттик деңгээлде ойлонгон ишмер кылып элге алып чыгып, шайлоодон эски динозаврларды жеңип чыкканы эсинде болсо керек...

Азизбек КЕЛДИБЕКОВ, NazarNews.kg