Бишкек шаарына түштүк аймактан кара куурай ташыган топтун иши ачыкка чыкты, деп билдирди бүгүн, 27-январда ИИМдин басма сөз кызматы. Операцияны Баңгизаттарды мыйзамсыз жүгүртүүгө каршы күрөшүү кызматынын ыкчам-иликтөө башкармалыгынын кызматкерлери жүргүзгөн.

Расмий маалымат боюнча, Токтогул РИИБдин Тергөө кызматынын кызматкерлери 27-январга караган түнү саат 00:30 чамасында Токтогул шаарындагы Ош—Бишкек жолунан мурда каракчылык үчүн соттолгон 1997-жылы туулган Р.А. аттуу жаранды кармашкан. Анын жанынан кочкул-жашыл түстөгү кара куурайдай жыты бар зат табылган.

«Ошондой эле кара баштыктын ичинде гашиш жыттанган, кочкул-жашыл түстөгү, скотч менен оролгон 30 таңгактагы зат чыккан. Бул заттын жалпы салмагы 2 кг 788 граммды түздү», - деп айтылат маалыматта.

Шектүү убактылуу кармоочу жайга киргизилип, тергөө уланып жатат.

Булак: NazarNews.kg