АКШнын чалгын мекемесинин маалыматына караганда, Орусиянын президенти Владимир Путин Украинада узакка созулуучу согушка даярданып, Донбасстан тышкары максаттарга жетүүгө дагы эле үмүттөнүүдө.

Бул тууралуу 10-майда Сенаттын Куралдуу күчтөр боюнча комитетиндеги дүйнөдөгү коркунучтар талкууланган жыйында Кошмо Штаттардын Улуттук чалгын кызматынын директору Эврил Хэйнс билдирди.

Ал келерки айларда согуштун траекториясын алдын ала баамдоого мүмкүн болбой, кырдаал курчушу ыктымал экенин, Путиндин аскердик аракеттерди Украинанын чыгышында топтоо чечими убактылуу мүнөздө болушу мүмкүн экенин айтты.

Эске салсак, Орусия Украинага каршы согушту 24-февралда баштаган. Путин анын максаты «сегиз жылдан бери Киев режиминин басмырлоосуна, геноцидине кабылып келгендерди коргоо» жана бул үчүн «Украинаны демилитаризация жана денацификация» жасап жана Донбасстагы «жай жашоочулардын канына забын болгондорду» аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg