Армен Жигарханян 86 жашында дүйнө салды

Журналист: МЭЭРИМАЙ АЛЫБЕКОВА

14.11.2020, 20:06

20197

дүйнө жүзүндө

Мурдагы совет өлкөсүндө сүймөнчүккө ээ болгон театр жана кино өнөрпозу Армен Жигарханян 14-ноябрда таңга маал 86 жашында Москва шаарында дүйнөдөн кайтты. Бул тууралуу чет элдик басылмалар Москва драма театрына шилтеме берүү аркылуу жазды.

СССРдин эл артисти, актёр жана режиссёр Армен Жигарханяндын теги - тифлисстик армяндардан болот. Ал 1935-жылы 3-октябрда Ереван шаарында туулган.

Белгилүү болгондой эле, Армен Жигарханян 250дөн ашуун кинотасмада тартылган. Арасында өзгөчө "Кармалбас өч алуучулар", "Жолугушуу жайын өзгөртүүгө болбойт" тасмалары эл арасында кеңири тараган тасмалардан.

А.Жигарханян 2001-жылы коомчулук өкүлдөрүнүн НТВ сыналгы каналын коргоого алган катына кол койгондордун бири болгон. 2012-жылы ал Орусиядагы президенттик шайлоодо талапкер Владимир Путиндин ишенимдүү өкүлү болгон. Ал эми 2014-жылы Крым боюнча В.Путиндин турумун колдоого алган петицияга кол койбой койгон.

Ал Орусиянын "Ата мекенге сиңирген эмгеги үчүн" орденинин II, III, IV даражаларын алган. Ага Армениянын "Ардак" ордени ыйгарылган жана Еревандын ардактуу жараны наамы берилген. Ага кино жана театр өнөрүндөгү салымдары үчүн бир катар эл аралык сыйлыктар ыйгарылган.

Булак: NazarNews.kg