Чынын айтыш керек, бийлик үгүт ишине жакшы шарт түзүп берди. Албетте, акыркы күндөрдө оппозициялык маанайдагы лидерлерге карата кара пиарлар абдан көбөйдү. Ошондой болсо дагы, шайлоо маарасына чейин калыстык кармалды. Президент таза шайлоо боюнча тынымсыз билдирүү жасап, баш ийбегендерине чара көрдү. Эки күн мурун Садыр Жапаров Кеминге барганда дагы кескин пикирин билдирип: “Шайлоого ким кааласа катышып жатат. Оппозициясы, позициясы бар. “30 жылдан бери келаткан эски жүздөр, сайраган сагызган” — ​деп айтып жатасыңар. Эч кимисине бут тоскон жокпуз. Мурда бийликтин гана партиясына иштешчү. Оппозиция көчөдө калып аларга свет, залды, керек болсо көчөнү да берчү эмес. Анын баарын жок кылдык. Биз демократиялуу өлкөбүз” — ​деди. Биз ушул ойду улай, коомчулукка төмөндөгүдөй суроо салдык.

— Бийлик калыстыкты кармап, административдик ресурсту колдонгондорго чара көрүп, талапкерлердин баарына бирдей шарт түзүп берди. Эми шайлоо күнү капчыктуу адамдар эски илдет менен добуш сатып алууларды уюштуруп, таза шайлоо ураанына көө жаппайбы?

— Баары туура суроо болду, бирок бардык эле жерлерде тымызын урук-тууган, дос-тамыр, куда-сөөктөрүн чакырышып аз топко тамак беришип, "Эми бул бала, өзүбүздүн бала эмеспи, колдон келишинче колдоп койгула" деген эч ким билбеген эпизоддор толуп жатат же болбосо ошол эле урук-туугандар, куда-сөөктөрүнүн паспортторун каттап алышып, "Биздин партияга билгизбей бюллетень салып койгулачы" деген абал болбой койгон жок. Кыргыз минтип отурсак дегеле бирикпейбиз, өспөйбүз, экономика багыты да такыр өнүкпөйт. Кыргызды бириктириш өтө кыйын экен. Айтор, таза шайлоо таза өтөрүнө чоң күмөнүм бар.

Булак: Жаңы Ордо гезити