«Ишкерлердин укуктарын коргоо жөнүндө» мыйзамга аялдардын ишкердиги түшүнүгүн киргизүү сунушталды. Мыйзам долбоорун депутат Камиля Талиева менен Элдар Абакиров иштеп чыгып, коомдук талкууга чыгарды.

Төмөнкү 2 учур боюнча айтылат:

— Жеке ишкерлик аял тарабынан жүргүзүлгөндө;

— Акцияларынын же катышуу үлүшүнүн 51%дан кем эмеси аялга таандык, жана штаттык кызматкерлеринин 51%дан кем эмесин аялдар түзгөн, коммерциялык ишти жүзөгө ашыруучу юридикалык жак.

Депутаттардын айтымында, көптөгөн өлкөлөрдүн тажрыйбасы бизнес чөйрөсүндөгү аялдарга мамлекеттик колдоонун маанилүүлүгүн көрсөтөт.

«Аялдардын ишкердиги – социалдык-эмгек мамилелерин өнүктүрүүдөгү актуалдуу муктаждык, ал коом, эл аралык уюмдар тарабынан активдүү колдоого алынып, финансы-кредиттик уюмдар тарабынан колдоого алына баштады, бирок ишкердик демилгелерди турмушка ашыруу оңой эмес, бул мамлекет тарабынан комплекстүү жана системалуу колдоону талап кылат», — дейт авторлор.

Мыйзам долбоорунун маалыматтык негиздемесине ылайык, 2020-жылы эмгекке жарамдуу курактагы аялдардын жумуштуулук деңгээли 43% ды түзсө, ошол эле убакта эркектердин жумушчу күчкө катышуу деңгээли 70,9% ды түздү. Шаарларда аялдардын катышуу деңгээли- 46,8%, ал эми айыл жеринде – 40,6%ды түзөт. Экономикалык жактан активдүү эмес калктын арасында аялдардын үлүшү 69% түзөт. Ошол эле учурда, үй чарбасын жүргүзгөндөрдүн жалпы санынын 97% аялдар түзөт.

Булак: NazarNews.kg