Бүгүн, 16-сентябрда саат 08:25ке карата Тажикстандын чек арачылары Баткен облусунун Лейлек районундагы Кулунду, Максат жана Жаңы-Жер аймактарын аткылай баштады.

Көчөлөрдүн баары ызы-чуу, абал курч. Бул тууралуу NazarNews маалымат агенттигине окуя болгон жерден жергиликтүү тургун Шайырбек Орозалиев билдирди.

"Эртең менен 8:10до  тажик тарап бизге карата ок чыгарды. Кулунду, Интернационал, Разаков айылдарына кол салышты. Тажик тарап миномет, гранотомет менен аткылап жатышат. Жериликтүү тургундарды эвакуациялоо иштери жүрүүдө. Көчөлөрдүн баары ызы-чуу, абал курч. Биздин аймакты чек арачылар көзөмөлгө алууда", - дейт Шайырбек Орозалиев.

Белгилей кетсек, бүгүн, 16-сентябрда таңкы саат 06:00дө тажик тарап оор курал колдонуу менен кайрадан Кыргызстандын чек ара бекеттерин көздөй ок та баштаган.

Тажик тараптын куралдуу кол салуусунан 4 аскер кызматкери жарадар болду. Бул тууралуу президенттин Баткен облусундагы ыйгарым укуктуу өкүлүнүн басма сөз кызматы билдирди.

Маалыматка ылайык, саат 8:00гө карата Баткен районунун Кызыл-Бел, Көк-Таш, Тамдык, Достук айылдарында жана Төрт-Көчө участкасында ок атышуу болуп жатат.

Эске салсак, 14-сентябрда Баткендеги кыргыз-тажик чек арасында чыр чыгып, ок атышуу алгач Булак-Башы тилкесинде болгон. Андан соң чатак оту Как-Сайда, кийин Паскы-Арык аймагында жанган. Кыргыз тараптан эки жоокер жаракат алган. Андан соң "Самаркандек" заставасынын жанындагы атышууда эки кыргызстандык – бир аял жана бир эркек ок жегени, кийинчерээк 11 жаштагы бала жарадар болгону айтылган.

Учурда облус башчысы Абдикарим Алимбаев күч структуралары менен биргеликте чек арада иш алып барууда. Ал эми жалпы кырдаалды УКМК төрагасы Камчыбек Ташиев көзөмөлгө алууда.

Булак: NazarNews.kg