- Бектур мырза, жакынкы кезде эки-үч жолу суракка кирип чыктыңыз. Эмне маселе менен?..

- 2010-жылы Апрель, Июнь окуяларына байланыштуу болду. А кезде Жалал-Абад облусунун губернатору элем. Өзүм да кызыкдармын, көтөрүлүп жаткан маселе акыр-аягына чыгышына. Тергөөнүн купуялуулугун сактоого мажбурмун. Майда-чүйдөлөрүнө токтолбоюн. Күнөөлүүлөр өз жазасын алыш керек. Тергөөчүлөр ынанымдуу жооп алышты, жыйынтыгын күтөбүз. Буюрса, бул нерсеге чекит коюлат деп ойлойм.

- «Отунбаевага, Текебаевге ж.б. убактылуу өкмөттүн мүчөлөрүнө каршы көрсөтмө берип жатышат» дейт, ошондой болдубу?

- Мунун баары жалган. Мен эч кандай көрсөтмө бергеним жок. Кимдер күнөөлүү, кандай улуу державалар аралашканын, кандай максатта уюштурганын, биздин сырткы күчтөр менен болгон байланыштарын мендеги болгон маалыматтарды толугу менен бердим.

- Парламенттик шайлоого келели. Сенин оюнча таза өттүбү?

- Катышкан 21 партиянын ичинен онго жакыны «бул шайлоону тааныбайбыз» деп айтышты. Жада калса компьютерге кийлигишип, ичине кирип кетишти. «Эл каалагандай шайлоо болду» дегенден алысмын. Мен да ушул позициядамын.

- Мындан аркы кадамыңар кандай болмокчу?

- Шайлоону тааныбагандар, башка саясатчылар, укук коргоочулар, оппозиция маанайындагы жарандык активисттер азыр сүйлөшүп жатабыз. Жаңы жылдан кийин кеңири масштабда уюшуп, «Элдик парламент» дейбизби же башкабы, бир чоң блок түзүлөт. Күчөйбүз. Демократиялык күрөш улана берет. Мыйзам чегинде аракеттер болот.

- Шайлоодо утулуп калгандардын жеке ич күйдүүлүгү эмеспи?

- Биздин эч кандай ич күйдүүлүгүбүз жок. Кыргыз мамлекети демократиялык принциптерди сактап, демократиялык негизде өнүгүп кете берүүсү үчүн конструктивдүү маанайдагы оппозициялык жээкте иш алып баруубузду улантабыз.

- Бирдеме болсо эле президентти күнөөлөп жатып калабыз. А чынында кимдер күнөөлүү?

- Биде буга чейинки кулаган бийликтердин тегерек чети, анын командасынны эки жүздүүлөр, ууру-кескилер, олигархтар курчап, кулак мээсинин кужурун алып, «баары сооун, майкөл-сүткөл» деп жатышып, жетчү жерине жеткиришкен. Андан көрө бийлик бизди туура түшүнүп, айткан сындарыбызды кабыл алып,  натыйжалуу жыйынтык чыгарганы оң. Эч ким түбөлүк бийликте калган эмес, баарыбыз бул жагын эске алалы.

Булак: Азия News гезити