Кыргызстандык Бекзат Алмаз уулу Парижде өтүп жаткан Олимпиадада коло медаль үчүн беттешип, жеңилип калды.

Ал эркин күрөш боюнча турнирге 57 килограммга чейинки салмак ченинде катышып, 1/8 финалдан баштаган. Кыргызстандык биринчи беттеште казакстандык Мейрамбек Картбайды 4:1 эсебинде жеңип, чейрек финалда америкалык Спенсер Ричард Ли менен кез келди. Алмаз уулу андан 2:12 эсебинде утулуп калган.

Америкалык спортчу финалга чыгып, Алмаз уулуна жубатуучу турнирге катышууга мүмкүнчүлүк берген. Кыргызстандык коло медаль үчүн өзбекстандык Гуломжон Абдуллаев менен беттешип, жеңилип калды.