Британия менен Франция лидерлери Украинадагы конфликт аяктаган соң, өлкөгө "Тынчтык орнотуу күчтөрүн" жөнөтүү маселесин жашыруун талкуулап жатышат. Бул тууралуу британ өкмөтүндөгү булактарга шилтеме берип, Telegraph басылмасы жазды.

Британиянын премьер-министри сэр Кир Стармер жана Франциянын президенти Эммануэль Макрон согушту токтотуу боюнча кандайдыр бир макулдашуудан кийин британ жана француз аскерлерин Украинага тынчтык орнотуу күчтөрү катары жөнөтүү маселесин талкуулап жатышат,  деп айтылат макалада.

Басылманын маалыматы боюнча, сүйлөшүүлөрдүн деталдары жашыруун сакталууда. Ошого карабастан, булактардын айтымында, сэр Стармер бул демилгеге толугу менен көнө элек, ал эми Макрон буга чейин бул маселени Владимир Зеленский жана Польшанын премьер-министри Дональд Туск менен талкуулаганын айтып, демилгени колдоп жатат.

Маалыматтарга караганда, Париж менен Лондондун сүйлөшүүлөрүндө демилгенин так деталдары, жаңжалдын күчөшү коркунучу жана аскерлердин коопсуздугу сыяктуу маселелер кыйынчылык жаратууда.

Декабрда Туск Макронго Польшанын аскерлери ок атышууну токтоткондон кийин дагы Украинага кирбей турганын билдирген.

Өткөн жылы Reuters агенттиги Европа Биримдигинин атын атабаган кызматкерине шилтеме берип, конфликт аяктаган соң Украинага чет элдик аскерлерди жөнөтүү боюнча консенсус жок экенин, бирок бул боюнча беш-сегиз мамлекеттин коалициясын түзүү мүмкүнчүлүгү каралып жатканын жазган. Агенттиктин маалыматына ылайык, бул күчтөрдүн негизин Франция, Германия, Италия, Польша жана Британия сыяктуу ири өлкөлөр түзүшү мүмкүн. Бул үчүн болжол менен 100 миң аскер керек болот.
Ноябрда Россиянын Тышкы чалгындоо кызматынын басма сөз кызматы Батыш Украина армиясынын жөндөмдүүлүгүн калыбына келтирүү үчүн өлкөдө 100 миң адамдан турган "Тынчтык орнотуу контингентин" жайгаштыра турганын билдирген. Тышкы чалгындоо кызматы муну Украинаны факты боюнча оккупациялоо деп баалаган. Президенттин басма сөз катчысы Дмитрий Песков бул билдирүүгө комментарий берип, тынчтык орнотуучуларды жайгаштыруу эки тараптын макулдугусуз мүмкүн эмес экенин белгилеген.