15-майда британ чалгын кызматы Украинанын чыгышындагы Донбасс аймагында орус армиясынын чабуулунун “ыргагы солгундап, мөөнөтүнөн кыйла артта калганын” билдирди.

Британ коргоо министрлигинин бюллетенинде белгилегендей, ушул тапта Орусия февралда уруш башталгандан бери кара жерде согушкан күчүнүн үчтөн бирин жоготту.

24-февралда Орусия Украианага согуш ачып, Киевди басып ала албай калгандан кийин Донбасс аймагында күчүн үрөй баштаган.
Британ өкмөтү орус армиясы уруштун башында бир катар ийгиликке жеткени менен соңку айда Донбасстын аймагында алсырай түшкөнүн белгилейт.

(1/6)Russia’s Donbas offensive has lost momentum and fallen significantly behind schedule. Despite small-scale initial advances, Russia has failed to achieve substantial territorial gains over the past month whilst sustaining consistently high levels of attrition.

— Ministry of Defence 🇬🇧 (@DefenceHQ) May 15, 2022

Британ коргоо министрлиги азыркыдай шартта Орусия алдыңкы 30 күндө согуштун ыргагын тездете албай турганын боолголойт.

Орусиянын аскердик жетекчилери Украинадагы "операциясы" планга ылайык жүрүп жатканын билдирип келет. Анткен менен соңку окуялар жана орус аскерлеринин Харьковдогу бир топ айылдардан артка чегиниши украин тараптын чабуулдары көбөйгөнүн көрсөтүүдө.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg