Европа Биримдиги (ЕБ) Украинага 8 миллиард евро өлчөмүндөгү макрофинансылык жардамды жасалма түрдө кечеңдетип жатат. Бул тууралуу Украинанын президенти Владимир Зеленский билдирди.

«Мен күн сайын жана ар кандай жолдор менен Евробиримдиктин айрым лидерлерине украиналык пенсионерлер, биздин мажбурлап көчүрүлгөн (жарандар), мугалимдер жана бюджеттик төлөмдөргө көз каранды болгон башка адамдар өздөрүнүн чечкинсиздигинин же бюрократизминин туткуну болбошу керектигин эскертем. Украина үчүн сегиз миллиард евро азыр токтотулду. Биздин өлкө үчүн макрофинансылык жардамды жасалма түрдө кечеңдетүү же кылмыш же жаңылыштык», - деди Зеленский.

Зеленский Украинага жардам берүүнү кечеңдетип жаткан конкреттүү өлкөнүн атын атаган жок. Ал ошондой эле «бул ката жана оңдолот» деген үмүтүн билдирди.

Буга чейин Украина президентинин аппаратынын жетекчисинин орун басары Игорь Жовква Германияны 9 миллиард евро өлчөмүндөгү макрофинансылык жардамга тоскоолдук кылып жатат деп айыптаган. Анын айтымында, Украина буга чейин 1 миллиард евро алган, бирок Германия жана кээ бир европалык өлкөлөр калган 8 миллиард еврону берүүнү кечеңдетип жатышат.

Кечээ, 4-августта «Рейтер» агенттиги Евробиримдик сентябрь айына чейин Украинага 8 миллиард евро өлчөмүндө жаңы каржылык жардам пакетин түзүүгө ниеттенип жатканын кабарлады. Каражаттын бир бөлүгү Киевге грант түрүндө, калган бөлүгү насыя түрүндө берилет. Буга чейин Еврокомиссия Украинага июнь жана июль айларында макулдашылган 1 миллиард евро өлчөмүндөгү макрофинансылык кредиттик колдоону өткөрүп берүүнү аяктаган. 12-июлда Евробиримдиктин экономика жана каржы министрлер кеңеши Киевге насыя берүүнү жактырды.

Булак: NazarNews.kg