Бириккен Араб Эмираттарынын (БАЭ) президенти Мохаммед бин Заид Аль Нахайян 29-майда Пекинге келип, Кытайга мамлекеттик сапарын баштады.Бул тууралуу NazarNews маалыматтык агенттигине кытайлык CCTV plus агенттиги билдирди.

Мохаммед бин Заид Аль Нахайяндын сапары Кытайдын төрагасы Си Цзиньпиндин чакыруусу менен 29-31-май күндөрү болот.

Иш сапарынын алкагында БАЭ президенти 30-майда Пекинде өтө турган Кытай-Араб кызматташтык форумунун 10-министрлер жыйынынын ачылыш аземине катышат.

Мохаммед бин Заид Аль Нахайян 1961-жылы туулган. 2004-жылы Абу-Дабинин мураскор ханзаадасы болуп дайындалып, ошол эле жылы Абу-Дабинин Аткаруу кеңешинин төрагасы болуп дайындалган. 2022-жылдын май айында ал Абу-Дабинин башкаруучусу жана БАЭнин президенти болгон.

Кытайга карата достук позицияны карманып, эки тараптуу мамилелерди өнүктүрүүгө чоң маани берет.

Ал 1990-жылы май айында БАЭнин биринчи президенти шейх Заид бин Султан Аль Нахайянды Кытайга болгон сапарында коштоп барган. Мураскор ханзаада болуп дайындалгандан бери ал Кытайга беш жолу барган, тактап айтканда 2009-жылдын августунда, 2012-жылдын мартында, 2015-жылдын декабрында, 2019-жылдын июль айында жана 2022-жылдын февралында.

Булак: NazarNews.kg