Орусия Федерациясы менен Украинанын ортосундагы согуш майданда ийгилик менен бүтпөйт, тигил же бул сүйлөшүү үстөлүндө. Мындай пикирин тышкы иштер министри Мавлуд Чавушоглу кечээ, 23-ноябрда Анкара университеттеринин биринде Түркиянын тышкы саясатына арналган конференцияда билдирди.

Чавушоглу Орусия Федерациясы менен Украинанын тышкы иштер министрлеринин Анталиядагы жолугушуусу жана Орусия Федерациясы менен Украинанын делегацияларынын Стамбулдагы бетме-бет жолугушуусунан кийин тараптардын ок атышпоо келишимине жакын болгонун эске салды. Бирок кийинчерээк тараптар сүйлөшүүдөн баш тартышкан.

«Бүгүнкү шарттар марттан такыр башкача. Жаңы реалдуулуктар бар. Кырдаал татаалыраак, бирок үмүттү үзбөш керек», - деди министр.

Анын айтымында, Украинадагы аскердик компонентке таянуу менен согуш ондогон жылдарга созулуп кетүү коркунучу бар.

Түрк дипломатиясынын башчысы Анкаранын Орусия-Украина согушун токтотуу аракетине көңүл бурду.

Чавушоглу Киев менен Москванын ортосунда туткундарды алмашуу президент Режеп Тайып Эрдогандын жеке аракети менен мүмкүн болгонун эске салды. Түрк тараптын дагы бир демилгеси МАГАТЭнин башкы директорунун орусиялык «Росатом» мамлекеттик корпорациясынын делегациясы менен Запорожье АЭСинде жолугушуусу болду.

Түрк министри президент Эрдогандын НАТО лидерлеринин ичинен Украина жана Орусия Федерациясынын президенттери менен тең укуктуу байланышта боло алган жалгыз адам экенин айтты.

«НАТОго мүчө болуу Орусия же башка өлкө менен диалогдон баш тартууну билдирбейт. Туура тең салмактуулукту сактоо маанилүү», - дейт министр.

Булак: NazarNews.kg