Көк-Арт дарыясында суу ташкындоо коркунучу пайда болгонуна байланыштуу Жалал-Абад шаарында өзгөчө кырдаал тартиби киргизилди. Бул тууралуу Өзгөчө кырдаалдар министрлигинен билдирди.

"Нөшөрлөп жааган жаандан улам Көк-Арт дарыясында 10-коргоочу тосмонун сол жээгинин 20 метрин суу жеп, Жалал-Абад шаарындагы турак үйлөргө жана мекемелерге коркунуч жаралган. Буга байланыштуу Жалал-Абад шаарына 18-март күнү өзгөчө кырдаал режими киргизилген", — деп айтылат билдирүүдө.

Соңку үч күндөн бери ӨКМ, шаардын жарандык коргонуу кызматтары, облустук Сел жана суу ташкындарын алдын алуу агенттиги тарабынан суунун нугун бөгөөчү таштар алып келинип, жээк бекемделүүдө.

Учурда жеринде 20га чукул атайын техника иштеп, аталган 20 метрдин жарымы бекемделип бүттү.

Булак: NazarNews.kg