Египетте россиялык 6 турист каза болду

Журналист: АЙСУЛУУ ТАЛАНТ

28.03.2025, 10:57

21126

дүйнө жүзүндө

Египеттин Хургада шаарынын жанындагы Кызыл деңизде суу алдында жүрүүчү туристтик кеме чөгүп кеткенден кийин россиялык 6 жаран каза болду, деп маалымдады «Би-Би-Си».

Кызыл деңиз провинциясынын губернатору Амр Ханафинин айтымында, окуя бейшемби күнү болуп, кырсыкта 39 адам куткарылган.

Учурда кырсыктын себептери иликтенип жатат.

«Би-Би-Синин» Каирдеги кабарчысы билдиргендей, «Sindbad» компаниясынын кемеси жээктен алыс эмес жерде чөгүп кеткен. Компания бир нече жылдан бери Хургада аймагында туристтик саякаттарды уюштуруп келген.

Россиянын Хургададагы консулу Виктор Воропаев «ТАСС» агенттигине 5 россиялык туристтин каза болгонун, алардын экөө жашы жете элек өспүрүмдөр болгонун билдирди. «ТАСС» ошондой эле 45 туристтин баары Россиянын жарандары болгонун жазган.

Бирок кийинчерээк провинциянын губернатору «Би-Би-Сиге» батискафта Индия, Норвегия жана Швециядан келген жүргүнчүлөр жана египеттик 5 адам болгонун билдирип, каза болгондордун баары россиялыктар экенин тастыктады.

Россиянын консулдугу берген маалыматка ылайык, батискаф менен болгон кырсык жээктен 1 километр алыстыкта, эртең мененки саат 10дор чамасында болгон.

Жаракат алгандардын арасында 4 адам оор абалда.