Бул кышта өлкөдөгү эритүүчү заводдордо электр жарыгы өчүрүлүшү мүмкүн. Ошондой эле мончо, сауналарга энергиянын башка булактарына өтүү сунушталууда. Бул тууралуу "Электр станциялары" ААКсынан билдирди.

Маалыматка караганда, "Кыргызстан улуттук электр тармагы" ишканасы электр энергиясын көп сарптаган ири өндүрүш ишканаларынын жетекчилери менен жыйын өткөргөн.

Жогоруда аталган эки ишкананын тең жетекчилери жыйынга келгендерге 2021-2022-жылдын күз, кыш мезгилинен ийгиликтүү өтүү үчүн электр энергиясын үнөмдөө керектигин эскертишти.

"Бул максатта эритүүчү жана куюучу заводдордо, ошондой эле электр энергиясын көп сарптаган башка ишканаларда кышында электр жарыгын өчүрүү маселеси каралып жатат. Мындан тышкары, мончо жана сауналарга энергиянын башка булактарына өтүү сунушталууда", — деп айтылат билдирүүдө.

Ошондой эле Бишкектин чек ортосундагы ЦУМ, ЦУМ-2 жана "Дордой Плаза" соода борборлорунда электр энергиясы кандай колдонулуп жаткандыгын аныктоо үчүн текшерүү иштери жүргүзүлдү. Аталган борборлорго электр энергиясын жеткирген "Электросила" компаниясы берген маалыматка караганда, булар колдонгон энергиянын көлөмү белгиленген чектен ашкан жок. Ошого карабай электр тогун жылытууга колдонууга болбой турганы эскертилди.

Белгилей кетсек, Токтогул суу сактагычында суунун көлөмү төмөн болуп жатканына байланыштуу быйылкы күз-кыш мезгилдеринде электр энергиясынын тартыштыгы жаралды. Мындан улам энергетиктер жарыкты үнөмдүү пайдаланууга чакырууда.

Эске салсак, буга чейин учурда энергетикадагы чыныгы абал кандай экенин энергетика министринин орун басары Тилек Айталиев айтып берген.

Булак: NazarNews.kg