Түркиянын президенти Режеп Тайып Эрдоган Стамбул жана өлкөнүн башка шаарларындагы нааразылык акцияларына комментарий берип, бийлик массалык башаламандыкка чакырыктарга көз жумбай турганын билдирди.

«Маргиналдык топтордун артынан ээрчип, полицияга кол салып, сот жана прокурорлорго коркунуч келтирип, демократияга жана улуттук эркке каршы чыгып, мыйзамсыз жана демократиялык эмес ыкмалар менен эч нерсеге жетише албайбыз. Түркия – көчөдөн табылган өлкө эмес. Ал көчөдөгү зомбулукка багынбайт», - деди Эрдоган.

Ал өкмөт өлкөдөгү кырдаалды туруксуздаштыруу аракеттерине жол бербесин белгиледи.

«Биз эч кимге Түркиянын тынчтыгын бузууга жана элибиздин туруктуулугуна кимдир бирөөнүн жеке кызыкчылыгы үчүн кол салууга жол бербейбиз. Биз улуттун биримдигине жана ынтымагына доо кетирген ар кандай аракеттерге каршыбыз. Республикалык элдик партиянын төрагасы Озгүр Өзелдин массалык нааразылык акцияларына чакырыгы туңгуюкка кетүүчү жол», -деп кошумчалады түрк лидери.

19-мартта Стамбул мэри Экрем Имамоглу коррупция жана террордук ишмердүүлүккө көмөктөшүү боюнча кармалган. Ал бийликтин кысымы астында баш ийүүнү көздөбөй турганын билдирди.

Оппозициялык саясатчынын кармалышы коопсуздук чараларынын күчөтүлгөнүнө жана жекшембиге чейин митингдерге тыюу салынганына карабастан, массалык нааразылык акцияларын жаратты. 20-мартта аны колдоо акциялары Анкара жана Стамбулда өтүп, анын жүрүшүндө 16 полиция кызматкери жаракат алган.

Президент Эрдоган оппозицияны полицияга жана сот адилеттигине кысым көрсөтүүдө деп айыптап, өкмөт өлкөнүн көйгөйлөрүн чечүүгө басым жасап жатканын белгиледи. Президенттин администрациясы Эрдоганга карата айтылган айыптоолорду негизсиз жалаа деп атап, Имамоглу мөөнөтүнөн мурда боло турган шайлоодо Эрдогандын болжолдуу атаандашы катары каралып жатканын белгиледи.