Түркиянын президенти Режеп Тайип Эрдоган анын өлкөсүнө келген АКШнын мамлекеттик катчысы Майк Помпео менен жолукпайт. Буга анын иш графигинин өзгөрүп кетиши себеп болгонун РИА Новости жазды.

Жолугушуу бардык тараптардын кызыкчылыгы болгонуна карабастан ишке ашпай калган.

"Мамлекеттик катчы да, Түркиянын тышкы иштер министри Чавушоглу баш болгон расмий өкүлдөр да, балким президент Эрдоган өзү да жолугушууга кызыкдар болгон. Бирок жыйынтыгында ишке ашпай калды. Себеби мамлекет башчы Эрдогандын иш графигине өзгөртүүлөр киргизилгендиктен, биз белгилеген учурга убактысы болбой калды", — деп Мамлекеттик департаменттин өкүлү Стамбулдагы брифингде билдирген.

Ал, ошондой эле, бир катар маселелер боюнча Вашингтон менен Анкаранын ортосунда салкын мамиле бар экенин моюндап, бирок жолугушуунун болбой калганына анын тиешеси жоктугун белгилеген. Помпео пикир келишпестиктер тууралуу айтып жатып, бир катар аймактар, анын ичинде Чыгыш Жер ортолук деңизи, Ливия жана Сирия боюнча сөз болуп жатканын кошумчалаган.

АКШнын мамлекеттик катчысы 10 күндүк иш сапарынын алкагында жети өлкөгө барат. Алар: Франция, Түркия, Грузия, Израиль, Бириккен Араб Эмирликтери, Катар жана Сауд Аравиясы.

Стамбулда Помпео Константинополь патриархы Варфоломей менен жолугууну пландап жатат.

АКШ менен Түркиянын мамилеси Анкарага россиялык жаңыланган ракетага каршы коргонуучу С-400 системасы берилгенден кийин салкындаган. Вашингтон Түркиядан Россия менен алаканы токтотуп, анын ордуна америкалык Patriot комплексин сатып алууну талап кылган. Муну менен кошо АКШ бийлиги Түркияга жаңыланган F-35 бомбалоочу учагын сатпай коерун айтып, CAATSA (Санкциялар аркылуу Американын душмандарына каршы аракеттенүү жөнүндө) мыйзамына ылайык санкцияларды киргизебиз деп коркуткан. Ал эми Анкара АКШнын талаптарын аткарбастан, тескерисинче, С-400 системасынын кошумча партиясын сатып алуу боюнча сүйлөшүүлөрдү жүргүзгөн.

Булак: NazarNews.kg