Европанын элин европалыктар түзбөй калды

Журналист: NAZARNEWS

29.12.2025, 11:34

22672

дүйнө жүзүндө

Америкалык ишкер Илон Маск Европадагы демографиялык өзгөрүүлөргө байланыштуу талаштуу пикирин билдирип, айрым европалык шаарларда калктын курамы түп-тамырынан өзгөрүп жатканын айтты. Анын айтымында, бул көрүнүш айрыкча Европа Биримдигинин борбору саналган Брюссел шаарында ачык байкалат.

Маск социалдык тармактагы билдирүүсүндө айрым статистикалык маалыматтарга таянып, Брюсселдеги балдардын 73 пайызы “европалык эмес” деп эсептелерин жазган. Анын пикиринде, бул факт шаарда жана жалпы Европада “калктын алмашуусу” (population replacement) жүрүп жатканын көрсөтөт.

Миллиардер буга чейин да Брюссел тууралуу ушундай эле ой-пикирлерин айтып, шаар “бельгиялык мүнөзүн жоготуп бара жатат” деген билдирүү жасаган. РИА Новости таанышкан статистикалык маалыматтарга ылайык, Брюссел шаарында жашаган калктын болжол менен 78 пайызы этникалык жактан бельгиялык эмес тектен экени көрсөтүлөт. Бул көрсөткүчтөр шаарда мигранттардын жана алардын урпактарынын үлүшү жогору экенин айгинелейт.

Демографтар менен социологдордун айтымында, Европада калктын картаюусу, эмгек күчүнө болгон муктаждык жана глобалдашуу миграцияны күчөткөн негизги факторлор болуп саналат. Ошол эле учурда, бул процесс коомдо интеграция, билим берүү, социалдык саясат жана улуттук иденттүүлүк тууралуу талкууларды жаратпай койбойт.