Россиянын Федералдык коопсуздук кызматы (ФСБ) Украина атайын кызматтары тарабынан даярдалган Крым көпүрөсүндөгү терактты алдын алды. Россиянын Коомчулук менен байланыш борбору (ЦОС) билдиргендей, Chevrolet Volt үлгүсүндөгү автоунаадан чоң кубаттагы кол жасалма жардыргыч табылып, зыянсыздандырылды. Ошондой эле, аны Россияга жеткирүүгө катышкан адамдар кармалды.

ЦОСтун маалыматы боюнча, "Россиянын Федералдык коопсуздук кызматы Крым көпүрөсүнө жардыргыч зат менен жабдылган автоунааны колдонуп, украиналык атайын кызматтардын жасоого аракеттенген кезектеги террористтик чабуулду токтотту". Автоунаа ири кубаттагы кол жасалма жардыргыч менен жабдылып, Украинадан бир катар өлкөлөр аркылуу Россияга өткөнү аныкталды. Бул тууралуу ТАСС билдирди.

ФСБнын өкүлдөрү "Украин террористтеринин бардык амалдарына карабай, ФСБ кызматкерлери алардын пландарын өз убагында аныктап, автоунаага кылдаттык менен жашырылган жардыргыч затты табышып, зыянсыздандырышты. Мындан тышкары, Россияга алып өтүүгө тиешеси бар адамдардын бардыгы кармалды", — деп белгилешти.

ЦОСтун маалыматына ылайык, автоунаа Россия–Грузия чек арасындагы Түндүк Осетиядагы "Верхний Ларс" эл аралык көзөмөл өткөрмө пунктунан өтүп, жеке айдоочунун автовозунда Краснодар крайына жеткирилмекчи болгон. Ал жерде аны башка айдоочуга өткөрүп беришип, Крым көпүрөсүнөн өтүп бараткан учурда ал киши Киев режими тарабынан "капаска түшүрүлгөн" жанкечти болуп калмак.

ФСБ белгилегендей, 2025-жылы Украина атайын кызматтарынын автоунааларды ири көлөмдөгү жардыргыч зат менен колдонуп, Крым көпүрөсүнө диверсия жасоого жасаган экинчи аракети болуп жатат. 2-апрелде Белорусия күч түзүмдөрү Союздук мамлекеттин белорус–поляк чек арасындагы (Брест бажысы) көзөмөлдө 500 килограммдан ашык синтетикалык жардыргыч зат жүктөлгөн микроавтобусту токтотушкан. Ал автоунаа да дал ушундай террористтик чабуул үчүн арналган болчу. Тергөө учурунда кылмышка катышкан адамдар, анын ичинде өз миссиясынан кабары жок айдоочу да кармалган, ал дагы Крым көпүрөсүнөн өтүп бара жатып "жанкечтиге" айланмак.

Бул жаңы факты боюнча кылмыш иши козголуп, иликтөө жүрүп жатат. ФСБнын маалыматына караганда, бардык уюштуруучулар жана катышуучулар татыктуу жана катуу жазасын алышат.