«Мен депутат болуп калсам, элдин көйгөйүн көтөрөм» деген эң жеңил жол. Мындай пикирди журналист Гүльзада Шаршеналиева өзүнүн Facebook баракчасына жазып чыкты.

«Таарынбагылачы. Бирок, Жогорку Кеңештин депутаттыгынын баркы ушунчалык кетти. Эмнеден улам айтып жатам?  Беш күн депутатка жардамчы болгону деле, беш сөз жазып, ар кайсыл саясатчыны кер какшыкка салганы деле, өзүн блогер атаганы деле, бир автордук долбоор жасабай, редактордун жаз дегенин жазган журналисти деле, алып-сатып беш-он сом топтоп алганы деле, «мен деле депутат болсом жарашат экен» деп астейил сүрөттөрүн жүктөп, өлкөдөгү саясий окуяларга активдүү көз караштарын токуп эле бир балээ эле болуп бир баратабыз. Парламенттеги болгону 120 орундун тарпын кетирдик.

Айланайындарым, акылдууларым, намыстууларым, «мен депутат болуп калсам, элдин көйгөйүн көтөрөм» деген эң жеңил жол. Бириң бир Баш мыйзамды баш аягына чейин окуп көрдүңөр бекен? Барып калсам, кандай мыйзам жазам, кайсыл багыттагы мыйзамга толуктоо-өзгөртүү киргизем, элдин жүгун көтөрө аламбы деп ойлондуңар бекен? Тигил деле чуркап жатыптыр, бул деле чуркап жатыптыр. Ал деле болот экен, бул деле болот экен. Отузга чыга элек, ини- сиңдилерим, өтө маанилүү замандаштарым, «өз оокатыбызды» тыңыраак кылалы дагы ДАРАМЕТКЕ жараша ДЫМАК күтөлү. Жөн эле "КҮЧМЭН" ЖЕ "КҮЧМЭМ" боло бербейличи. Бир жылдан бери бул жөнүндө пикирим алмашпаптыр», - деп кошумчалаган ал.

Булак: NazarNews.kg