Бүгүн, 20 жаштардагы белгисиз адам болжол менен жашы жете элек өспүрүмдү зордуктап жаткан видеотасма тараган. Бул ыплас иш мончодо болгон, бирок качан тартылганы белгисиз. Аталган видеотасма коомчулук арасында нааразычылыктарды жаратууда.

Бир нече саат мурун Ички иштер министрлиги бул факты боюнча ыкчам жана тергөө кызматтары тарабынан зордуктоого шектүүнүн өздүгүн тактоо жана кармоо боюнча иштерди жүргүзүп жаткандыгы айтып, аймактык ички иштер органдары окуянын чоо-жайын аныктоо жана шектүүнүн өздүгүн тактоо боюнча чараларды көрө баштаганы жарыяланган.

ИИМдин Баcма сөз кызматынын жетекчиси Бакыт Сейитов чуулгандуу видеотасма боюнча кыргызстандыктарга Кайрылуу жасады. 

Урматтуу достор! Кыргызстандыктар!

Социалдык түйүндөрдө тараган видеоролик боюнча ИИМ бүгүн маалымат берген эле. Биз тактоо жана аныктоо иш чараларын жүргүзүп жаттык. Анын үстүнө маселе тактала электе социалдык түйүндөрдө провакацияга алдырган да жарандар болду. Ошол эле соцтүйүндөр аркылуу ар кандай сүрөттөрдү салышып, ушул жигит экен деген да маалыматтар, аудио маалыматтар да тарап жатат. Божомолго алдырбай так маалыматтарды күтөлү. Ошол себептүү бул маалыматты тактап койолу дедик. Аталган видео роликтеги окуя Кыргызстандын аймагында болгон эмес, бул окуя чет мамлекеттердин биринде болгондугу такталды.

Экинчиден аталган видеоролик бир эки жыл мурун болгондугу жана бул факты боюнча жоопкерчиликке тартылгандыгы тууралуу маалымат аныкталууда. Кыргыз Республикасынын ички иштер министрлиги аталган окуянын чоо жайын тактоо максатында ошол мамлекетке ыйгарым түрдө суроо өтүнүчүбүздү жибердик. Кыска убакыттын ичинде бул видео качан болгондугу, кайсы жерде болгондугу тууралуу, кимдер экендиги жана кабыл алынган чечимдер боюнча ыйгарым түрдө билдиребиз.

Урматтуу достор, бул окуяга кайдыгер карабаган замандаштарым аталган факт боюнча жакын арада кошумча маалымат болот тургандыгын билдиремин, - деди Бакыт Сеитов.

Булак: NazarNews.kg