Индия Россиядан 60 млн баррель мунай сатып алды

Журналист: АЙСУЛУУ ТАЛАНТ

26.03.2026, 8:37

3855

дүйнө жүзүндө

Индиянын мунай иштетүүчү заводдору Россиядан апрель айында жеткириле турган болжол менен 60 миллион баррель мунай сатып алышты. Бул тууралуу Bloomberg маалымдады.

Агенттиктин маалыматына караганда, бул келишимдер Нью-Делинин мунай жеткирүүлөрүнө байланыштуу кооптонууларын басаңдатты.

Bloomberg Индия көмүрсуутек ресурстарын импорттоого абдан көз каранды экенин эске салды. Россия менен Украина ортосундагы жаңжал башталгандан кийин, Индия арзандатылган баада россиялык мунайды эң көп сатып алган өлкөлөрдүн бири болуп калган. Бирок өткөн жылдын аягынан тартып АКШнын басымы алдында бул импорт кескин кыскарган. Натыйжада Нью-Дели Сауд Аравия жана Ирак сыяктуу өлкөлөрдөн жеткирүүлөргө өткөн. Бирок алардын көбү АКШ менен Израилдин Иранга жасаган чабуулунан кийин Перс булуңунун аймагында бөгөттөлүп калган.

Март айынын башында АКШнын Каржы министрлиги Индияга 4-апрелге чейин танкерлерге жүктөлгөн россиялык мунайды 5-мартка чейин сатып алууга уруксат берген. Андан кийин департамент мөөнөттөрдү тиешелүүлүгүнө жараша 11-апрелге жана 12-мартка чейин узарткан.

S&P Global Commodities at Sea маалыматы боюнча, Индияга россиялык мунай жеткирүү март айында февраль айына салыштырмалуу 27%га көбөйүп, күнүнө 1,4 миллион баррелге жеткен.