Израил Сириянын борбору Дамасктын жанындагы бир катар буталарга сокку урду. Бул тууралуу Сириянын SANA маалымат агенттиги аскерий булактарга таянуу менен билдирди.
Ракеталар Голан дөңсөөлөрүнөн жергиликтүү убакыт боюнча саат 02:10до атылган.

"Чабуулдардын натыйжасында материалдык зыян келтирилди, абадан коргонуу системалары душмандын бир катар ракеталарын атып түшүрдү", — деп айтылат маалыматта.

Израилдин бийликтери кол салуу тууралуу кабарларга комментарий бере элек.

Белгилей кетсек, 17-мартта социалдык тармактарда Израилдин аба күчтөрү Каламон аймагындагы бир нече бутага сокку ургандыгы тууралуу маалымат тараган.

Маалымат үчүн айта кетсек, 2011-жылдын мартында Сирияда ички жаңжал башталгандан бери Израил Иран колдогон топторго жана Сирия армиясынын аскерий буталарына мезгил-мезгили менен чабуул жасап келет. Сирия армиясы жана Иран колдогон топтордон тышкары Дамаск жана анын айланасында ливандык Хезболла кыймылынын согушкерлери бар.

Булак: NazarNews.kg