«Казактардын кыргыздарга «Эл аралык террорист» деп койгон дооматтары эп келбей, калпып чыкты. Мындай пикирин укук коргоочу Качкын Булатов билдирди.

«Казакстандын күч органдарынынбы же атайын кызматынын тапшырмасыбы айтор, Казакстандагы болгон окуяга кыргыз тарапты күнөөлөөгө аракет кыла башташты. Ошон үчүн митингге тиешеси жокторду да кармап, күч менен 90 миң теңге үчүн митингге катышкам дедиришти.

Ал турсун мыйзамдагы ууру атыккан «Жапайы Арманына» кыргыздар алтын саткан дүкөндөрдү тоноду деген сөздөрдү айттырышты. Чынында Камчы Көлбаев мындай ыплас сөздөрдү айтмак эмес. Анткени, мыйзамдагы уурулардын да өзүнчө статусу болот. Айт дегенди эле айтып чыга беришпейт.

Кыскасы, мыйзамдагы уурусу баш болуп,  бийликтин тапшырмасын аткарышты. Мындай саясат менен алар көпкө узабайт. Ар кимге доомат арткандан мурун, этек-жеңин оңдоп, багытын тууралашы керек. Аларга бул нерсе абийир алып келбейт.

Кыргыздар революцияга жакын эл деп эле «эл аралык террорист» деген ярлык тагабыз дегени карабай Кудайдын көзү түз экен, кармалган жараныбыз террорист эмес, музыкант болуп чыкты.  «Эл аралык террорист» деп койгон дооматтары эп келбей, чындык кыска убакытта калпып чыкты.

Чынында Казакстандагы кандуу окуя Назарбаев менен Токаевдин кармашы. Ал маселени башка мамлекеттерге оодара салуудан мурун Казакстандын мамлекеттүүлүгүн сактап калуунун аракетин көрүшкөнү оң.

Кыргыздарга болгон күнөөнү оодара салабыз дегени кыргыздарга эле эмес, Кудайга да жакпайт», - деп билдирди Булатов.

Булак: NazarNews.kg