Министрлер кабинетинин төрагасы Адылбек Касымалиев маданий байланыштарды чыңдоо жана чыгармачыл индустрияларды өнүктүрүү боюнча эл аралык конференцияда сөз сүйлөдү. Бул тууралуу Министрлер кабинетинин басма сөз кызматы билдирди.

Касымалиев бүгүнкү күндө маданий өз ара аракеттенүү жана чыгармачыл индустрияларды колдоо маселелери гуманитардык күн тартибинин алкагынан чыгып, улуттук иденттүүлүктү, адамдык капиталды жана мамлекеттердин атаандаштыкка жөндөмдүүлүгүн чыңдоонун маанилүү элементи болуп жатканын белгиледи.

Анын айтымында, Евразия мейкиндиги өз өнүгүү тарыхындагы уникалдуу мезгилди баштан кечирүүдө, классикалык экономикалык моделдер жана логистикалык чынжырлар трансформацияланууда, бирок ондогон жылдар бою сыналган терең маданий байланыштар элдерди бириктирген бузулгус көпүрө бойдон калууда.

«Бирок 21-кылымда байланыштарды жөн эле сактап калуу жетишсиз — аларды заманбап инновациялардын нугуна буруу зарыл», - деп эсептейт ал.

Касымалиев чыгармачыл индустриялар бай маданий мурасты реалдуу экономикалык секторга айландырган, биринчи кезекте жаштар үчүн жумуш орундарын түзгөн жана жогорку технологиялык экспортту жараткан курал экенин айтты.

«Кыргызстандын мамлекеттик саясаты синергетикалык моделге өттү, мында инсандын руханий өнүгүүсү фундаменталдык негиз, инфраструктурага салынган масштабдуу инвестициялар — таяныч, ал эми чыгармачыл экономика — жогорку технологиялык кыймылдаткыч болуп саналат», - деди ал.

Касымалиев акыркы 3 жылдын ичинде маданият тармагына салынган мамлекеттик инвестициялар 32 млн доллардан 105 млн долларга чейин, башкача айтканда 3 эседен ашык көбөйгөнүн, ал эми маданият кызматкерлеринин эмгек акысы 100%га жогорулаганын белгиледи.

Ал 2022-жылы «Чыгармачыл индустриялар паркы жөнүндө» мыйзам кабыл алынганын, Чыгармачыл индустриялар паркынын резиденттери кирешеден болгону бир пайыз өлчөмүндө бирдиктүү салык төлөрүн эске салды. Бүгүнкү күндө паркта 165 резидент иштеп жатат.

Касымалиев КМШнын 35 жылдыгынын алкагында Чыңгыз Айтматовдун 100 жылдыгынын жана Лев Толстойдун 200 жылдыгынын маанисин жаңы санариптик муунга жеткирүүнү сунуштады.

«Жасалма интеллекттин жашоонун бардык тармактарына, анын ичинде маданиятка тездик менен аралашышы, глобалдык санариптик экспансия шартында автордук укук кризисине алып келип, бүткүл Евразиянын масштабында укуктук боштукту жаратты», - деди Касымалиев.

Ал жасалма интеллект доорунда интеллектуалдык менчикти коргоонун бирдиктүү эрежелерин жана санариптик механизмдерин биргелешип иштеп чыгуу зарылдыгына токтолду.

«Жасалма интеллект алгоритмдерди түзөт. Адам маанилерди түзөт. Элдерибиздин интеллектуалдык капиталын сактап калалы жана көбөйтөлү», - деп кошумчалады ал.