Кыргыз Республикасынын Өзгөчө кырдаалдар министрлигинде БУУнун Өнүктүрүү программасынын (ПРООН), ПРООНдун Стамбулдагы аймактык хабынын жана Өзгөчө кырдаалдар жана кырсыктардын тобокелдигин азайтуу борборунун өкүлдөрү менен жолугушуу өттү.

Жолугушуу ПРООН менен Япония өкмөтүнүн Борбор Азиядагы табигый кырсыктардын тобокелдигин азайтуу системасын чыңдоого, ошондой эле шаарлардын кырсыктарга жана климаттын өзгөрүшүнө туруктуулугун жогорулатууга багытталган аймактык демилгелеринин алкагында уюштурулду.

Жолугушууга ӨКМдин эл аралык кызматташтык башкармалыгынын, Башкы ыкчам башкармалыгынын, Өзгөчө кырдаалдарды мониторингдөө жана божомолдоо департаментинин, «Кыргызгидрометтин» жана Кырсыктардын тобокелдигин азайтуу боюнча улуттук платформанын катчылыгынын өкүлдөрү катышты.

Тараптар аймактык долбоорлорду ишке ашыруу, сейсмикалык туруктуулукту жогорулатуу, жер титирөөлөрдү эрте эскертүү системаларын өнүктүрүү, өзгөчө кырдаалдарды мониторингдөө жана божомолдоо иштерин күчөтүү, ошондой эле табигый кырсыктардын тобокелдигин азайтуу жаатындагы кызматташууну кеңейтүү маселелерин талкуулашты.

Мындан тышкары, социалдык маанилүү инфраструктура объекттеринин даярдыгын жогорулатуу, Борбор Азия өлкөлөрүнүн тажрыйба алмашуусу, тобокелдиктерди башкаруунун заманбап ыкмаларын киргизүү жана аймактык кызматташтыкты бекемдөө маселелерине өзгөчө көңүл бурулду.

Жыйынтыгында тараптар кызматташуунун артыкчылыктуу багыттарын тактоо боюнча жумушчу консультацияларды улантуу жана биргелешкен аймактык долбоорлорду ишке ашырууну улантуу тууралуу макулдашышты.