Жалпысынан аталган рейтингге Кыргызстандын үч жогорку окуу жайы кирген.

БИШКЕК, 7-июн. — Sputnik. Кыргыз-Россия Славян университети QS World University Rankings аттуу ЖОЖдордун дүйнөлүк рейтингине кирди. Бул тууралуу окуу жайдын маалымат кызматы билдирди.

Аталган рейтинг билим берүүнүн сапатына, илимий ишмердүүлүктү жана окуу жайлардын аброюн баалоого мүмкүндүк берген критерийлердин негизинде түзүлгөн. 1 503 ЖОЖдун ичичнен КРСУ 851-орунду ээлеген. Мындан тышкары, тизмеге Кыргыз-түрк "Манас" университети менен Исхак Раззаков атындагы Кыргыз техникалык университети дагы кирген.

Рейтингге кирүүнүн негизги критерийлери:

академиялык репутациясы (40 пайыз) — окумуштуулардын арасында жүргүзүлгөн сурамжылоонун негизинде академиялык тажрыйба жана жетишкендиктер бааланат;

иш берүүчүлөр арасындагы аброю (10 пайыз) — сурамжылоонун негизинде кайсы ЖОЖдо мыкты адистерди даярдай турганы аныкталат;

мугалимге канча студент туура келери (20 пайыз) — студенттер үчүн мугалимдердин жеткиликтүүлүгү жана окуу процессинин сапаты бааланат;

илимий басылмаларга шилтеме берүү (20 пайыз) — окуу жайдын изилдөөлөрүнүн дүйнөлүк илимий коомчулукка тийгизген таасирин өлчөө;

чет өлкөлүк окутуучулардын үлүшү (5 пайыз) — окуу жай канчалык илимий кызматкерлерди кызыктырарын чагылдырат;

чет өлкөлүк студенттердин үлүшү (5 пайыз) — башка өлкөлөрдөн келген студенттер үчүн окуу жай канчалык жагымдуу экенин көрсөтөт.

КРСУнун ректору Денис Фомин-Нилов окуу жайдын дүйнөлүк рейтингге кириши чоң жетишкендик экендигин белгиледи.

"Бул — биздин эмгегибиздин, биз берген билимдин сапатынын баасы. Аталган рейтингдеги кыргыз ЖОЖдорунун ичинен КРСУ алдыда экенине сыймыктанабыз жана алдыга жылуу үчүн аракетибизди көрөбүз", — деди Фомин-Нилов.

Булак: NazarNews.kg