Бүгүн, 22-сентябрь парламенттин жалпы жыйынында башкы прокурор Курманкул Зулушев кечээ депутатка айткан сөзү боюнча комментарий берди. Ал эч кимге заказ берип иш козгоо аракетин көрбөгөнүн белгиледи.

"Мен Башкы прокурор катары эч качан бирөөнүн артынан заказ берип, арыз алып же камап укугун тебелебейм, акым дагы жок. Иштөө стилимди дагы көрүп жатасыздар, эч кандай заказ менен иш кылбайбыз. Себеби башкы прокурор өзүнүн жеке кызыкчылыгын мамлекеттик ишке аралаштырбашы керек. Ошондуктан мен милдетимди так аткарам деп ойлойм", — деди Зулушев.

Белгилей кетсек, кечээ, 21-сентябрда, парламенттин тармактын комитетинин жыйынында депутат Мирлан Жээнчороев башкы прокурор ага иш козгоо үчүн УКМК төрагасына команда берип жатканын билдирген. Ага Зулушев "Мен эч кимге команда бербейм. Эгер команда болсо сизге бир нерсе таап коюш оңой эле" - деп жооп берген.

Булак: NazarNews.kg