Министрлер кабинетине караштуу Транспорт каражаттарын жана айдоочулук курамды каттоо боюнча мамлекеттик агенттик президент Садыр Жапаровдун "Автотранспорт каражаттарын легалдаштыруу боюнча чаралар жөнүндө" жарлыгын аткаруу максатында чет элдик номерлүү унааларды легалдаштыруу башталганын жарыялайт.

Легалдаштыруу 1-апрелде башталып, 2025-жылдын 1-октябрында аяктайт. Унааларды мамлекеттик агенттиктин бардык аймактык бөлүмдөрүндө легалдаштырууга болот.

Бул үчүн унаа ээлери:

– Евразия экономикалык биримдигинин шайкештигин баалоо боюнча бирдиктүү реестрине киргизилген лаборатория тарабынан берилген транспорттук каражаттын конструкциясынын коопсуздук сертификаты;

– фотографиялык жазуусу бар визуалдык кароо жүргүзүү үчүн транспорт каражаты;

– сүрөткө тартуу менен визуалдык текшерүү үчүн транспорт каражаты;

– транспорт каражаттарын жана айдоочуларды каттоо чөйрөсүндөгү ыйгарым укуктуу орган тарабынан белгиленген форма боюнча арыз;

– өздүгүн тастыктаган документ;

– транспорт каражатын каттоо тууралуу күбөлүк (эгер бар болсо);

– транспорт каражатына менчик укугун тастыктоочу документ;

– транспорт каражаты издөөдө эместиги, күрөөгө коюлбагандыгы, үчүнчү жактар менен талаш-тартыш болбогондугу, камакка алынбагандыгы жана такси катары пайдаланылбагандыгы тууралуу милдеттенме;

– мамлекеттик чек арадан өткөндүгү жөнүндө чек ара көзөмөлүн жүзөгө ашыруучу ыйгарым укуктуу мамлекеттик органдын маалымкаты. Маалымкат жок болгон учурда транспорт каражатын ташып келүү күнү 2024-жылдын 31-декабры деп эсептелинет;

– каттоо үчүн жыйымдарды жана төлөмдөрдү төлөгөндүгү жөнүндө дүмүрчөк, атайын бланктарды жана мамлекеттик каттоо белгилерин. Төлөм электрондук төлөмдөрдү кабыл алуу системалары аркылуу жүргүзүлүшү мүмкүн;

– 100 миң сом өлчөмүндө легалдаштыруу жыйымдарын төлөгөндүгү жөнүндө дүмүрчөктү көрсөтүүгө тийиш;

Белгилей кетсек, 2024-жылдын 31-декабрына чейин Кыргызстандын аймагына ташылып келген, чет мамлекеттердин мамлекеттик номурлары бар, укук белгилөөчү документтери жок жана бажылык тариздөөдөн өтпөгөн бардык транспорт каражаттары легализацияланууга тийиш.

Муну менен катар легалдаштырылган унаа каражаттарынын ээлерине 10-аймактын мамлекеттик номурлары ыйгарылат.

Кошумчалай кетсек, бул автотранспорт каражаттары андан ары ээликтен ажыратылууга жана Кыргыз стандын чегинен тышкары алып чыгууга жатпайт, аларды такси катары колдонууга болбойт.