Кытайдын чыгышын каптаган "Бави" тайфунунун кесепетинен өлкө бийлиги кеңири масштабдагы эвакуация жүргүзүп, өзгөчө кырдаалга каршы чараларды күчөттү. Чжэцзян провинциясында 2,68 миллион адам коопсуз аймактарга көчүрүлүп, 19 миңден ашуун убактылуу баш калкалоочу жай ачылды. Бул тууралуу «Синьхуа» агенттиги билдирди.

Маалыматка ылайык, быйылкы тогузунчу тайфун болгон "Бави" 11-июль күнү кечинде Чжэцзяндын жээгине эки жолу сокку урган. Тайфундун борборунда шамалдын ылдамдыгы секундасына 40 метрге жеткен. Учурда ал өлкөнүн ички аймактарына жылып, бара-бара алсырап баратканы айтылууда.

Акыркы 24 саат ичинде провинциянын дээрлик 42 пайыз аймагында 50 миллиметрден ашык жаан жааган. Адистер сел, жер көчкү жана шаарларды суу каптоо коркунучу жогору экенин эскертишти.

Тайфун жээкке чыга электе эле бийлик мектептердеги сабактарды токтотуп, 830 курулуш аянтчасын, 400дөн ашуун туристтик жайды жана 200дөн ашык көңүл ачуучу объекттин ишин убактылуу токтоткон.

Кытайдын Улуттук өнүктүрүү жана реформалар комиссиясы Чжэцзян провинциясында калыбына келтирүү иштерине 100 миллион юань (болжол менен 14,7 миллион АКШ доллары) бөлдү. Бул каражат жолдорду, гидротехникалык курулмаларды, мектептерди, ооруканаларды жана башка мамлекеттик инфраструктураны оңдоого жумшалат.

Синоптиктердин маалыматына караганда, 15-июлга чейин Чжэцзян, Аньхой, Цзянси, Ляонин жана Цзилинь провинцияларынын айрым аймактарында нөшөрлүү жаан уланат. Ошондуктан Аньхойдогу суу сактагычтардан суу чыгаруу иштери башталып, Шэньян шаарында мектептер, бала бакчалар жана айрым коомдук жайлар убактылуу жабылды.

Өзгөчө кырдаалдар министрлиги Чжэцзян, Тяньцзинь жана Аньхой аймактарына 70 миң даана гуманитардык жардам — бүктөлүүчү керебеттерди, жууркандарды, жайкы шейшептерди жана өзгөчө кырдаалдар үчүн керектүү топтомдорду жөнөттү.

Учурда тайфундан жабыркаган аймактарда кесепеттерди жоюу иштери уланууда. Атайын кызматтар кулаган бактарды, жол белгилерин жана шамал кыйраткан конструкцияларды тазалап, жер көчкүдөн улам жабылган жолдорду оор техника менен ачууда. Бийлик инфраструктураны мүмкүн болушунча тезирээк калыбына келтирүүгө аракет кылып жатат.